لە سلێمانی شانۆیەك بۆ ساڵیادی ژینا ئەمینی قەدەغەكرا

سلێمانی

بڕیار بوو ئێوارەی ئەمڕۆ، لە ساڵیادیی شۆڕشی “ژن، ژیان، ئازادی” و ژینا ئەمینی شانۆیەك لەلایەن ڕێكخراوی نوێگەرەوە پێشكەش بكرێت، بەڵام لەلایەن هێزەکانی ئاسایشی سلێمانییەوە ڕێگری لێکرا و  ئەنجام نەدرا، بەڕێوەبەری ڕێكخراوەكەش دەڵێت: بەبێ هیچ بیانوویەك شانۆکە قەدەغە کرا.

لە ساڵیادی شۆڕشی “ژن، ژیان، ئازادی” و ژینا ئەمینی لە ڕۆژهەڵاتی كوردستان، بڕیار وابوو ئێوارەی ئەمڕۆ، ڕێكخراوی نوێگەر، لە شاری سلێمانیی، شانۆیەك لە پاركی ئازادیی پێشكەش بكات.

هێڤار مستەفا، بەڕێوەبەری ڕێكخراوی نوێگەر بە ڕۆژنیوزی ڕاگەیاند: مۆڵەتی یاساییمان وەرگرتبوو كە ئەم ئێوارەیە شانۆكە پێشكەش بكەین، بەڵام ئاسایشی سلێمانی لە ڕێگەی پەیوەندیی تەلەفۆنییەوە شانۆكەیان قەدەغەكرد و هەڕەشەی داخستنی ڕێكخراوەكەمانیشیان كرد.

وتیشی: داوای لێبوردن لە میوانانمان دەكەین، لە هەوڵەكانمان بەردەوام دەبین تا پێشكەشی بكەین.

ب.گ