حكومەتی عێراق دەوڵەتی تورک تۆمەتبار دەکات بە بۆردوومانەکەی عەربەت
ناوەندی هەواڵەكان
وتەبێژی فەرماندەی گشتی هێزە چەكدارەكانی عێراق بڵاوی كردەوە، ئەو فڕۆكە بێفڕۆكەوانەی كە فڕۆكەخانەی كشتوكاڵی عەربەتی لە سلێمانی بۆردوومان كرد لە توركیاوە هاتووە، دەشڵێت: ئەم دەستدرێژییە پێشێلكردنی سەروەریی و ئاسایش و یەكپارچەیی خاكی عێراقە.
لیوا یەحیا رەسوڵ وتەبێژی فەرماندەی گشتی هێزە چەكدارەكانی عێراق سەبارەت بە بۆردوومانەكەی دوێنێی فڕۆكەخانەی كشتوكاڵی عەربەت ڕاگەیەندراوێكی بڵاو كردەوە.
لە ڕِاگەیاندراوەكەدا هاتووە، كاتژمێر ٥:٠٠ی ئێوارەی ڕۆژی دووشەممە ١٨ی ئەیلول فڕۆكەیەكی بێفڕۆكەوان لە دیوی سنووری توركیاوە هاتوەتە ناو خاكی عێراق و فڕۆكەخانەی كشتوكاڵی عەربەتی لە پارێزگای سلێمانی بۆردوومان كردووە و بەهۆیەوە سێ پاڵەوانی دەزگای دژەتیرۆر شەهیدبوون و سێ قارەمانی تر برینداربوون.
ئاماژەی بەوەش كردووە، ئەم دەستدرێژییە پێشێلكردنی سەروەریی و ئاسایش و یەكپارچەیی خاكی عێراقە و پێشێلكاریی و هەڕەشەیە بۆ سەر ئاشتی و ئاسایش لە ناوچەكە و جیهان و پێشێلكردنی بڕگەكانی یاسا نێودەوڵەتییەكان و بنەماكان و ئامانجەكانی جاڕنامەی نەتەوە یەكگرتووەكانە.
ڕوونیشی كردەوە، ئەم هێرشە دووبارەبووانە لەگەڵ بنەمای پەیوەندیی باشی دراوسێیەتی نێوان وڵاتان ناگونجێن و هەڕەشەن بۆ سەر هەوڵەكانی عێراق بۆ بنیاتنانی پەیوەندییەكی باش و هاوسەنگی سیاسیی و ئابووریی و ئەمنیی هاوسەنگ لەگەڵ دراوسێكانیدا.
لیوا یەحیا ڕەسوڵ لە كۆتاییدا دەڵێت: عێراق مافی خۆیەتی كۆتایی بەم پێشێلكارییانە بهێنێت.
پاشنیوەڕۆی دوێنێ دووشەممە فڕۆكەی بێفڕۆكەوان فڕۆكەخانەی كشتوكاڵی عەربەتی كردە ئامانج و بەهۆیەوە سێ پێشمەرگەی دژەتیرۆری كوردستان (CTG) گیانیان لەدەست دا و سێ پێشمەرگەی دیكەش برینداربوون.
هـ.ئ
Comments are closed.