پەیەدە: یەکگرتنمان تاکە ڕێگایە بۆ پوچەڵکردنەوەی هەموو پلانگێڕییەکان دژی گەلەکەمان

ناوەندی هەواڵەکان

هاوسەرۆکانی پارتی یەکێتی دیموکرات “پەیەدە” پەیامێکی هاوخەمیان ئاڕاستەی سەرۆکی یەنەکە و سەرکردایەتی هێزەکانی دژە تیرۆر کرد، بەبۆنەی شەهیدبوون و برینداربوونی ژمارەیەک لە پێشمەرگەکانیان، کە بەهۆی بۆردوومانێکی فڕۆکەی بێفڕۆکەوانی دەوڵەتی داگیرکەری تورک بۆ سەر فڕۆکەخانەی کشتوکاڵی عەربەت ڕویداوە .

هاوسەرۆکانی پارتی یەکێتی دیموکرات “پەیەدە” پەیامێکی هاوخەمیان ئاڕاستەی سەرۆکی یەنەکە و سەرکردایەتی هێزەکانی دژەتیرۆر کرد لەبارەی هێرشەکەی ڕۆژی دووشەمەی سەر فڕۆکەخانەی کشتوکاڵی عەربەت لە پارێزگای سلێمانی .

لە ڕاگەیەنراوێکدا هاتوە، هاوخەمی و سەرخۆشی خۆمانتان ئاڕاستە دەکەین، بەبۆنەی شەهیدبوون و برینداربوونی ژمارەیەک لەلاوانی گەلەکەمان کە وەستاون دژی دوژمنانی کورد لە سەنگەرەکانی پێشەوە، بۆ پاراستنی ژیان و کەرامەت و بەهاو دەستکەوتەکان، لە دەرئەنجامی ئەو هێرشە توندڕەوانەی فاشیستی تورکیا کە بەدرۆن ئەنجامی دەدات، بەبەزاندنی هەموو بەها ئەخلاقییەکان و یاسا نێودەوڵەتییەکان.

ئاماژەیان بەوەشداوە، شەهیدان و بریندارانی هێزەکانی دژە تیرۆر و هاوڕێیانیان، شان بە شانی هێزەکانی دژە تیرۆری هێزەکانی سوریای دیموکرات وەستابوون لە ڕۆژئاوا و باشوور، خوێنیان تێکەڵ بە یەک بووە بۆ پاراستنی کەرامەت وشەرەفی نەتەوەی کورد، چی لە ڕۆژئاوا یان شنگال یان کەرکوک، ئەم هێزانە وەک قەڵغان و پەنا بۆ پاراستنی گەلی کورد دەمێنن .

لەبارەی دوژمنانی کوردەوە ڕایدەگەنێت، لەم قۆناغە هەستیارەدا دوژمنانی گەلی کورد یەکیان گرتووە و هێرش دەکەنە سەر گەلەکەمان و جەخت لەسەر یەکڕیزی و پێشخستنی پەیوەندییەکانیان دەکاتەوە تا بەرامبەر بە دوژمنان و سیخورەکان بوەستنەوە.

لە کۆتایی بەیاننامەکەدا ڕایانگەیاند، یەکگرتنمان تاکە ڕێگایە بۆ پوچەڵکردنەوەی هەموو پلانگێڕییەکان دژی گەلەکەمان ئەنجام دەدرێت، ئامادەیی خۆیان دەربڕی بۆ یەکڕیزی گەلی کورد وهەموو هەنگاوێک دەنێن و ئامادەن دەستی هاوکاری درێژ بکەن .

ر.س