وەزارەتی بازرگانی هەرێم: یەکەمین بانکی نیشتیمانی لە هەرێمی کوردستان تۆمارکرا

ناوەندی هەواڵەکان

لە ڕاگەیەنراوێکدا وەزارەتی بازرگانی و پیشەسازی ھەرێمی کوردستان یەکەمین بانکی نیشتیمانی لە هەرێمی کوردستان تۆمارکرا و ئاماژە بەوەدەدەن، خزمەتگوزارییەکانی هاوشێوەی بانکی ناوەندی دەبێت بۆ ئاڵوگۆڕی دراوەکان و فەرمانبەران موچەکانیان بەدەست بگات

بەڕێوەبەرایەتی گشتی تۆماری کۆمپانیاکانی سەربەوەزارەتی بازرگانی و پیشەسازی، تۆمارکردنی یەکەمین کۆمپانیای بانکی نیشتمانی کوردستان بەناوی (بانکی نیشتمان) ڕاگەیاند.

وەزارەتی بازرگانی دەڵێت:  ئەم بانکە بانکێکی فەرمی حکومەتی هەرێمی کوردستانە و ڕاستەوخۆ بەبانکی ناوەندی عێراقی فیدڕاڵەوە دەبەسترێتەوە و  تایبەتمەندییەکانی ئەم بانکە و ئەو خزمەتگوزاریانەی پێشکەشی دەکات، بەهەمان شێوەی بانکی ناوەندیی دەبێت و وەک بوونی سەکۆیەکی ئەلیکترۆنی بۆ ئاڵوگۆڕی دراوەکان، کە بازرگانان و هاوڵاتیان ئەتوانن لێی سودمەند بن، هەروەها ڕاستەوخۆ مانگانە بەشە بودجەی هەرێم و موچەی فەرمانبەران دەگوازرێتەوە ئەم بانکە، و فەرمانبەران دەتوانن لەڕێی ئەم بانکەوە مووچەکانیان بەدەست بگات.

ڕاشیگەیاند، ئەم بانکە وەک بانکێکی فەرمی گشتگیری حکومەت مامەڵەی لەگەڵ دەکرێت و جیاواز لە بانکە حکومیەکانی تر خزمەتگوزاریەکانی لە بواری جیاوازی بانکیدا پێشکەش دەکات و تەنها هەڵگرتنی پارە نیە.

ڕوونیکردوەتەوە، ڕێکارەکانی دامەزراندنی ئەم بانکە لە هەرێمی کوردستان تەواوبووە و ئەوەی ماوەتەوە هەندێک ڕێکاری ڕۆتینیە لەگەڵ بانکی ناوەندی و لەئایندەیەکی نزیکدا تەواو دەکرێت.

ڕ.س