دوو تەرمی پیاو و ژنێک لە شنگال بە کوژراوی دۆزرانەوە

ناوەندی هەواڵەکان

سه‌رچاوه‌یه‌كی ئه‌منی له‌ شارۆچکەی شنگال ئه‌مڕۆ ڕایگه‌یاند، دوو ته‌رمی پیاو و ژنێك دۆزراونه‌ته‌وه‌ كه‌ ئاسه‌واری گوللـه‌ به‌جه‌سته‌یانه‌وه‌ دیاره‌ و له‌ئێستاشدا، ڕه‌وانه‌ی پزیشكی داد كراون به‌مه‌به‌ستی ئه‌نجامدانی توێكاری.

به‌وته‌ی سه‌رچاوه‌یه‌كی ئه‌منی، هێزه‌ ئه‌منییه‌كان پاش گه‌ڕان و به‌دواداچون بۆ دۆزینه‌وه‌ی چاره‌نوسی ژن و پیاوێك، ئه‌مڕۆ ته‌رمه‌كانیان له‌ شارۆچکەی شه‌نگال دۆزیوه‌ته‌وه‌ و ڕاسته‌وخۆش ڕه‌وانه‌ی پزیشكی دادیان كردون به‌مه‌به‌ستی ئه‌نجامدانی توێكاری.

ئاماژە بەوەشدراوە، ژن و پیاوه‌كه‌ له‌ بنه‌ڕه‌تدا دانیشتووی شارەدێی خانه‌سۆرن و ماوه‌ی زیاتر له‌ سێ رۆژه‌ دیارنه‌ماون، تاوه‌كو ئێستا هۆكاری كوژرانیان نه‌زانراوه‌ و لێكۆڵینه‌وه‌ی هێزه‌ ئه‌منیه‌كانیش له‌وباره‌یه‌وه‌ ده‌ستیپێكردوه‌.

ڕونیشکراوەتەوە‌، په‌ڕاوی لێكۆڵینه‌وه‌ بۆ دیاریكردنی بارودۆخی ڕوداوه‌كه‌ كراوه‌ته‌وه‌، تاوه‌كو ئێستاش هیچ كه‌سێك به‌تۆمه‌تی كوشتنیان ده‌ستگیرنه‌كراون.

ر.س