“پۆستی سەرۆكی پەرلەمان بۆ پیاوە پیرەكە یەكلایی دەبێتەوە”

بنار هیدایەت

شەڕی كورسییە چۆڵەكەی سەرۆكی پێشووی پەرلەمان محەمەد حەلبووسی بەردەوامی هەیە، شیعە و سوننە كاندید لەدوای كاندید پێشكەش دەكەن و كاندیدێكی دیكە دەستنیشان دەكرێت، شەڕی مەشهەدانی و مەتەڕ ئەو كێشەیە یەكلایی دەكاتەوە.

دانیشتنی پێشوو بكرایە مەشهەدانی سەرۆكی پەرلەمان دەبوو

لە چەند ڕۆژی ڕابردوو، بڕیاربوو دانیشتنی ئەنجوومەنی نوێنەرانی عێراق بكرێت بۆ دەستنیشانكردنی سەرۆكێكی نوێ، بەڵام دانیشتنەكە نەكرا، د. ئاسۆ فەرەیدوون پەرلەمانتاری یەنەكە لە تۆڕی كۆمەڵایەتی ئێكس بڵاوی كردەوە، ئەگەر دانیشتنی سبەی بكرێت و دوا نەخرێت، مەحموود مەشهەدانی دەكرا بە سەرۆك، بەڵام زۆرینەی لایەنەكان لەگەڵ دواخستنی دانیشتنەكە بوون و دواجار دانیشتنەكە دواخرا، لە ئێستادا زیاتر لە چەند كاندیدێك پێشنیار كراون بۆ ئەو پۆستە، گرنگترینیان مەحموود مەشهەدانی و سالم مەتەڕن بۆ ئەوەی ببنە شوێنگرەوەی محەمەد حەلبووسی سەرۆكی پەرلەمانی عێراق.

ئەنبار چارەنووسی حەلبووسی یەكلایی دەكاتەوە

لە پۆستی پارێزگارییەوە تا وەرگرتنی سەرۆكی پەرلەمانی عێراق، چاوی حەلبووسی لەسەر پارێزگای ئەنبار بوو بە شێوەیەك خزمەتی ئەو شارەی دەكرد، توانی لە هەڵبژاردنی پێشوو زۆرترین كورسی ئەنجوومەنی پارێزگای ئەنبار مسۆگەر بكات، بەپێی زانیارییەكان یاری چوون لە كارخستنی محەمەد حەلبووسی بوو، بەڵام لە یاری گەڕانەوە هەڵبژاردنی سەرۆكی پەرلەمانی عێراق بكەوێتە دوای هەڵبژاردن لە سوودی حەلبووسی یەكلایی دەكاتەوە، بە جۆرێك گۆڵێكی محەمەد حەلبووسی بەرامبەر بە دە گۆڵی دادگای فیدراڵی عێراق دەبێت، حەلبووسی نایەوێت ئەنباری لەدەست بچێت، چونكە بەڕای چاودێران لە دەستچوونی ئەنبار كۆتایی حەلبووسی مسۆگەر دەكات. ئەمەی بەرامبەر بە حەلبووسی كراوە شەڕی ئەنبار و ئەنجوومەنی پارێزگای ئەنبارە، بەڵام دواجار ئەنبارییەكان خۆیان بۆ حەلبووسی یەكلایی كردووەتەوە.

چاوەكان لەسەر پیاوە پیرەكەی بەغدا چڕكراونەتەوە

مەحمود مەشهەدانی بە پیاوە پیرەكەی پەرلەمانی عێراق لەلایەن سوننەكانەوە و بە تایبەتی لە بەغدا ناسراوە، لەلایەن سوننەوە پێشنیار كراوە بۆ وەرگرتنی ئەو پۆستە، هەردوو تەیاری تەقەدووم و سیادە بە سەرۆكایەتی “خەمیس خەنجەر و محەمەد حەلبووسی” چوار ناویان پێشكەش كردووە، سیانیان لە تەقەدوومە و پێكدێن لە شەعلان كەریم، عەبدولكەریم عەبتان، یەحیا ئەلمحەمەدی، هەرچی كاندیدی خەمیس خەنجەرە سالم مەتەر ئەلعیساوییە خەڵكی فەلوجەیە و یەكێكە لە كەسایەتییە بەهێزە عەشائیرییەكان، پێشتر پەرلەمانتار موسەننا سامەڕائی لە كوتلەی عەزم پێشنیاركرا، بەڵام بە كشانەوەی دوو ناو پێشنیار كرا ئەوانیش مەحمود مەشهەدانی و خالید دەڕاجی بوون، ئەوەی شانسی نیە دەڕاجییە و تەنها بۆ پڕكردنەوەی ناو پێشنیاریان كردووە، دەوڵەتی یاسای مالیكی و عەسایبی قەیس خەز عەلی دەنگ بە مەشهەدانی دەدەن، عەممار و بەدر دەنگ بە چوار كاندیدە هاوبەشەكەی تەقەدووم و سیادە دەدەن، هەر چەندە بۆ چوونێك هەیە دەنگ نەدەن بە سێ كاندیدەكەی دیكە، چونكە حەلبووسی نایەوێت لە ترسی لەدەستچوونی ئەنبار سالم مەتەڕ دەربچێت، بۆ ئەوەی ئەنبار لە دەستی خۆیان بمێنێتەوە، ئەمە وایكردووە هەر چوار كاندیدەكە تا ئێستا چانسیان بەرامبەر بە مەشهەدانی لاوازە.

كورد لەو پرسە دەبێتە دووبەری شیعی و سوننی

بەپێی زانیارییەكان، ئەندامانی یەنەكە لە ئەنجوومەنی نوێنەرانی عێراق، ئەگەر موسەننا سامەڕائی نەكشێتەوە و بەردەوام بێت لە خۆ كاندیدكردن دەنگ بە سامەڕائی وەك نوێنەری كوتلەی عەزم دەدات، لە ئەگەری كشانەوەیدا، دەنگەكانیان بۆ مەحموود مەشهەدانی دەبێت، لەلایەكی دیكەوە پەرلەمانتارانی پەدەكە هاوپەیمانن لەگەڵ نوری مالیكی و ئەنجوومەنى باڵاى ئیسلامى و حەلبوسی و بەدر و خەمیس خەنجەر، بۆ ئەوەی كاندیدەكەی خۆیان سەربخەن.

تا ئێستا وەرگرتنی پۆستی سەرۆكی پەرلەمانی عێراق بۆ مەشهەدانی یەكلایی كراوەتەوە، بەو پێیەی زۆرترین تەمەنی هەیە و زۆرترین كوتلەی پەرلەمانی عێراق كێشەیان لەگەڵی نییە و لە ڕووی ئەزموون و سیاسییەوە گلەییەكان لەسەری كەمترن بەراورد بە كاندیدی لیست و قەوارەكانی دیكە.

ب. هـ

Comments are closed.