دوایین خۆچەماندنەوەی بارزانی بۆ ئەردۆغان لە دوبەی!

بنار هیدایەت

لە پەراوێزی لوتکەی جیهانیی کەشوهەوادا لە دوبەی، مەسروور بارزانی جارێکیتر خۆی چەماندەوە بۆ ئەردۆغان و لەگەڵیدا کۆبووەوە، وەک هەمیشە، لەناوبردنی پەكەكە و تەڤگەریی ئازادیی کورد و بەرژەوەندییە ئابوورییەکانی تورکیا لە هەرێم و نەوت، پرسی سەرەکییان بوو.

دوێنێ هەینی، مەسروور بارزانی، سەرۆکی حکومەتی کاربەڕێکەری هەرێمی کوردستان، لە چوارچێوەی بەشداریکردنی لە لوتکەی جیهانیی کەشوهەوا لە دوبەی، لەگەڵ ئەردۆغانی سەرۆکی دەوڵەتی داگیرکەریی تورک کۆبووەوە.

ئەمە چەندەمین جارە مەسروور بارزانی و ئەردۆغان دوور لە چاوی كامێراكان و ڕاگەیاندنەكان كۆبوونەوەی تایبەت دەكەن، زانیارییەكان ئاماژە بەوە دەكەن، دژایەتییکردنی کورد و پرسی ئەمنیی و ئابووریی و وزە، تەوەری سەرەكی كۆبوونەوەی نێوانیان بووە.

بە گوێرەی چاودێران و ئەو زانیارییانەی دەست ڕۆژنیوز کەوتووە، یەکێک لە تەوەرەکانی کۆبوونەوەکە هەناردنەکردنەوەی نەوتی هەرێم بووە لە بەندەری جەیهانەوە، لە ئێستادا توركیا فشاری خستووەتە سەر مەسروور بارزانی، تا كۆبوونەوە و چاوپێكەوتنەكانی لەگەڵ بەرپرسانی عێراق بەردەوامی هەبێت بۆ ئەوەی نەوتی هەرێمی كوردستان لە ڕێی توركیاوە هەناردەی دەرەوە بكرێت.

هەروەها دۆسییەی ئەمنیی لە دژی پەکەکە و تەڤگەری ئازادیی کورد، دۆسییە نەگۆڕ و سەرەکییەکەی نێوان بارزانی و ئەردۆغانە، لە ئێستادا دەوڵەتی داگیرکەریی تورک بە هاوکاریی پەدەکە ئامادەکاری بەرفراوان و چڕ دەکەن بۆ ئەنجامدانی هێرشێکی فراوانی داگیرکاریی بۆ سەر باشووری کوردستان، بۆ ئەمەش ئەردۆغان داوای هاوکاری زیاتری هەواڵگریی و سەربازیی و ئابووریی لە بارزانی کردووە.

ئەمە لە کاتێکدایە، لە ماوەكانی ڕابردوودا، هەریەك لە وڵاتانی ڕووسیا و عێراق و ئێران فشارێكی زۆریان كردووەتە سەر سەركردایەتی پەدەكە، لەبارەی ئەو پەیوەندییە ئاڵۆزەی لەگەڵ توركیا هەیەتی بە تایبەت لە بواری ئەمنیی و هەواڵگریی و ئابوورییدا، بۆیە لە دواین كۆبوونەوەیاندا مەسروور بارزانی داوای لە ئەردۆغان كردووە توركیا پاڵپشتییەکانی بۆ پەدەکە و ماڵی بارزانی زیاتر بكات، چونكە لە بەرامبەر ئەو دۆستایەتییە ئەگەر هەیە باجی قورس بدات لە گۆڕەپانی سیاسیی.

هەرچەندە بەرامبەر بە پارتەكانی باشووری كوردستان، پەدەكە هیچ هەڵوێستێكی ئەرێنی نییە و سازش بەرامبەر بە بچووكترین شت ناكات تا بە سوودی خۆی یەكلایی نەكاتەوە و دژایەتی لایەنە سیاسییەكانی هەر چوار بەشی کوردستان دەکات، بەڵام بە پێچەوانەوە هیچ گلەییەكی بچووك بەرامبەر بە داگیرکاریی و دەستدرێژییەكانی دەوڵەتی توركی داگیركەر نییە، هاوکات هەمیشە لە لاوازیی و سازش و خۆچەماندنەوە دایە.

هەرچەندە لە ڕابردوودا سەركردایەتی پەدەكە درووشمێكی بەرزكردووەتەوە بە ناوی “خۆناچەمێنین” دەرکەوت ئەم درووشمەیان لە بەرامبەر خەڵکی هەرێمی کوردستان و لایەنە سیاسییە کوردییەکانە و دوژمنانی گەلی کورد ناگرێتەوە و بۆ ئاغاکانی دوژمن هەمیشە غوڵام و چەماوەن.

ب.گ

Comments are closed.