حکومەت پشت دەکاتە هەڵەبجە و خێرخوازان پڕۆژەی خزمەتگوزاریی دەکەن

هەڵەبجە

بەهۆی پشتگوێخستنى پارێزگای هەڵەبجە لەلایەن حکومەتى هەرێمەوە پڕۆژە خزمەتگوزارییەکان لە سنووری ئەو پارێزگایە وەستاون و چەندین پڕۆژەى دیکەش پەکیان کەوتووە، بۆیە ئەو پڕۆژانەى دەکرێن لەو شارە تەنیا لەلایەن خێرخوازانەوە ئەنجام دەدرێن، جێگری پارێزگاری هەڵەبجەش دەڵێت: كێشە سیاسییەكان لە نێوان حیزبە دەسەڵاتدارەكاندا كاریگەری زۆری كردووەتە سەر پڕۆژە خزمەتگوزارییەکان.

پارێزگای هەڵەبجە یەکێک لەو ناوچە و شارانەى کە کەمترین پڕۆژەى خزمەتگوزاریی بۆ دەکرێت و لەلایەن حکومەتەوە بە تەواوی پەراوێز خراوە، بەڵام خێرخواز و سەرمایەدارانى شارەکە چەندین پڕۆژەی گرنگیان بۆ هەڵەبجە جێبەجێ کردووە.

حکومەت جگە لەوەى هیچ پڕۆژەیەکى نوێی بۆ تەرخان نەکردووە، نزیکەى ٢٠٠ پڕۆژەى تەواو نەکراویش بەهۆی نەبوونی پارەی نەختینەوە لە بانكەكاندا ناتوانرێت، كاری تێدا بكرێت، هاوڵاتییانی هەڵەبجەش ڕەخنەى توند لە حکومەت دەگرن لە پشتگوێخستنى ناوچەکەیان.

نەبەز ساڵح
نەبەز ساڵح

نەبەز ساڵح هاوڵاتییەکى هەڵەبجەیە و بۆ ڕۆژنیوز وتی: هەڵەبجە بودجەی پێویستی نییە بۆ جێبەجێكردنی پڕۆژەكانی، شارەكە بەراورد بە ناوچەكانی دیكە ئاوڕی كەمتری لێدراوەتەوە پەراوێز خراوە، چەندین پڕۆژە هەیە هی ساڵانی ڕابردووە، بەهۆی نەبوونی بودجەوە وەستاون بەرەو هەڵوەشانەوە دەچن.

ئەو هاوڵاتییە وتیشی: ئەو پڕۆژانەی هەیە خێرخوازان دەیكەن لە شارەكەدا نەك حكومەت، هەڵەبجە پێویستی بە پڕۆژەی گرنگ و ستراتیجی هەیە، بۆ ئەوەی شارەكە لە چەقبەستووییە دەربچێت وەك كردنەوەی پردی تووەقووت و مەرزی سازان و تەوێڵە و بیارە.

تۆفیق موستەفا
تۆفیق موستەفا

تۆفیق موستەفا، هاوڵاتییەكی تری هەڵەبجەیە و بۆ ڕۆژنیوز وتی: بۆچی دەبێت ململانێ‌ سیاسییەكانی نێوان هەردوو حیزبی دەسەڵاتدار تەنها لە هەڵەبجەدا بكرێت، پردی تووەقوت ماوەی ١٥ ساڵە باس لە درووستكردنی دەكرێت، بڕیاربوو بەردی بناغەكەی دابنرێت، بەڵام بەهۆی ململانێی سیاسی هەر دوو حیزبی دەسەڵاتدار كارەكە نەكرا.

وتیشی: ئەم كێشە سیاسییانە بە تەواوی بووەتە هۆی مراندن و نابووتكردنی هەڵەبجە، بە جۆرێك خەریكە شارەكە ڕوو لە چۆڵبوون دەكات، هیچ پڕۆژەیەكی بۆ ناكرێتەوە ئەو پڕۆژەشی بۆ دەردەچێت لەبەر نەبوونی نەختینە و پارە لە بانكەكاندا ئەویش جێبەجێ ناكرێت.

تۆفیق مستەفا باسی لەوەش كرد، هەڵەبجە کراوە بە پارێزگا، بەڵام ئێمە بەو جۆرە نای بینین، زۆرجار لە هەندێك وەزارەتەوە ناوی وەك پارێزگا نایەت لە نووسراوە ڕەسمییەكاندا، كاری جدیش بۆ نەكراوە بۆ ئەوەی لە عێراقدا بێتە پارێزگایەكی فەرمی، دەسەڵات لەبەر گەندەڵییەكانی خۆی نەیتوانیووە كار لەسەر بە پارێزگابوونی شارەكە بكات.

كاوە عەلی
كاوە عەلی

سەبارەت بە وەستانى پڕۆژە خزمەتگوزارییەکانی هەڵەبجە و پەراوێزخستنى شارەکە لەلایەن حکومەتەوە، كاوە عەلی جێگری پارێزگاری هەڵەبجە بۆ ڕۆژنیوز وتی:  ئەو پڕۆژانەی لە سنووری پارێزگای هەڵەبجەدان لەساڵی ٢٠١٠ تائێستا ١٩٨ پڕۆژەیە گوژمەی ٢٦٠ ملیار دیناریان پێویستە بۆ تەواوكردنیان.

وتیشی: هۆكاری كارنەكردنی پرۆژەكان نەبوونی پارەی نەختینەیە لە بانكدا كە بۆ پرۆژەكان دابین ناكرێت، هەروەها كێشە سیاسییەكانیش لە نێوان حیزبە دەسەڵاتدارەكان كاریگەری زۆری كردووەتە سەر جێبەجێنەكردنی ئەو پڕۆژانە.

جێگری پارێزگار ئاماژەى بەوەش کردووە، لە وەزارەتی ئاوەدانكردنەوەشەوە پێیان ڕاگەیاندرا بەهۆی كێشەی سیاسییەوە لە نێوان سەرۆكی حكومەت و جێگرەكەی ناتوانرێت بەردی بناغەی پردی تووەقوت دابنرێت كاری تێدا ناكرێت لە كاتێكدا پڕۆژەیەكی گرنگ و ستراتجییە بۆ هەڵەبجە.

هـ.ح

Comments are closed.