یەکەم دیداری ئەڵوەن بۆ هونەر و شارستانییەت لە خانەقین دەستی پێ کرد

گەرمیان

ئەمڕۆ یەکەم دیداری ئەڵوەن بۆ هونەر و شارستانییەت لە شارۆچکەی خانەقین دەستی پێ کرد، لە دیدارەکە ڕاگەیەندرا، هونەر شارۆچکەی خانەقینی کردووە بە پارێزەری ئاشتی و پێکەوە ژیانی کۆمەڵایەتی، سونبولی شارستانییەتە دێرینەکانە و پێگەیەکی جوگرافی گرنگی هەبووە و لانکەی هونەر و ئەدەب بووە.

ئەمڕۆ لە هۆڵی ناوەندی کولتووری لە شارۆچکەی خانەقینی سەر بە پارێزگای دیالە، یەکەم دیداری ئەڵوەن بۆ هونەر و شارستانییەت بەڕێوەچوو، دیدارەکە لە لایەن بەڕێوەبەرایەتی گشتی ڕۆشنبیریی و هونەری گەرمیان و بەڕێوەبەرایەتی ڕۆشنبیریی و هونەری خانەقین ڕێک خرا.

عادل حەسەن

لە دیدارەکە پێشانگایەکی وێنەکێشان کرایەوە و دوای وتەی لایەنە پەیوەندیدارەکان، چەندین چالاکی هونەری پێشکەش بە میوانەکان کرا و عادل حەسەن، بەڕێوەبەری گشتی ڕۆشنبیریی و هونەری گەرمیان وتی: خەڵکی خانەقین ئالوودەی هونەرن، لە خانەقین هونەر بووەتە پارێزەری ئاشتی، پێکەوە ژیانی کۆمەڵایەتی، تایبەتمەندی نەتەوەیی و ناوچەیی، هاوکات هۆکاری بەرقەراربوونی سیاسی و ئابووریشە، مێژووی ناوچەکە دەیان نموونەی جوانی هونەری و دەنگی ڕەسەنی تێدایە، هیوادارین ئەم دیدارە ببێتە نەریتێکی ساڵانە و دەوڵەمەندتری بکەین بە خوێندنەوە و توێژینەوەی زیاتر.

حەمەی حەمە سەعید

دواتر حەمەی حەمە سەعید، وەزیری ڕۆشنبیری و لاوانی هەرێمی کوردستان وتی: دروشمی دیدارەکە مانایەکی گەورە بە کایەی ڕۆشنبیری و هونەر دەبەخشێت، گیانی هەزاران ساڵەی ڕۆشنبیری و شارستانییەتی ئەم شارە پیشان دەدات، دەتوانین بڵێن خانەقین سونبولی شارستانییەتە دێرینەکان و پێکەوە بەستنی شارستانیەتەکان بووە، دەروازە و شا ڕێگەی بازرگانی بووە، هەر بۆیە بە دەروازەی خوراسان ناوبراوە.

وتیشی: خانەقین چەقی بەستنەوەی کیشوەرەکانی جیهانە، ڕێڕەوی ئابووری و بازرگانی بووە، بۆیە ئێستاش چاو لەسەر پێگەی جوگرافی خانەقینە، بەو پێیەی وڵاتانی (چین، ئێران و وڵاتانی ئاسیا) بە وڵاتی تورکیا و ئەورووپاوە دەبەستێتەوە، لە ڕووی کۆمەڵایەتیشەوە شوێنی پێکەوە ژیان بووە لە نێوان ئایین و نەتەوە جیاوازەکانەوە، لە ڕووی زمانیشەوە خانەقین گەنجینەیەکی گرنگی زار و شێوەزار و فەرهەنگی زمانی کوردییە، لە سەرەتای دامەزراندنی دەوڵەتی عێراق بڕیار بوو خانەقین بکرێت بە لیوا، بەڵام سیاسەتە یەک لە دوای یەکەکانی دەوڵەتی عێراق ڕێگر بوو، لە بەدیهێنانی ئەو خواستەی خەڵکی ناوچەکە.

جەلال شێخ نووری

هەروەها جەلال شێخ نووری، سەرپەرشتیاری ئیدارەی گەرمیان وتی: خانەقین هەمیشە بەشێک بووە لە گەرمیان و شارێکی دێرین و پرشنگدارە و لانکەی ئەدەب ڕۆشنبیریی بووە، ئەم شارە ئەمڕۆ باوەشی بۆ دیدارێک کردووەتەوە، دیدارەکە دەرفەتێکی زێڕینە بیکەین بە هەوێنی کاروانی هونەر و ڕۆشنبیری، هەرچەندە دۆخی سیاسی کاریگەری نەرێنی لەسەر پێشکەوتنی خانەقین هەبووە، بەڵام هەمیشە پەڕاوێکی بۆ دونیای هونەر و ڕۆشنبیری هێشتووەتەوە، هیواخوازین خزمەتی زیاتری ئەم شارە بکرێت.

ر.س

Comments are closed.