پەدەکە شکستەکانی لە کەرکووک بە درۆ پینە دەکات!

بنار هیدایەت

بەهۆی سیاسەتی دوژمنکارانەی پەدەکە بەرامبەر کورد و تێکدانی یەک لیستی کورد لە کەرکووک، بەشێکی زۆر لە لایەنگر و کادرانی وازیان لێهێنا و ناڕەزایەتییان نیشاندا، لە ئێستاشدا بۆ چەواشەکردنی ڕای گشتیی و شاردنەوەی شکستەکان-یان، کۆنە پارتییەکانی کەرکووک دێننە سەر شاشە، گوایە لە حزبی دیکەوە هاتووەتەوە ناو پەدەکەوە.

پەدەكە بە سیناریۆ دەیەوێت هێزی وەهمی خۆی لە هەڵبژاردنی ئەنجوومەنی پارێزگاكانی عێراق نمایش بکات، هەر جارە و كۆمەڵێك کۆنە كادر و خانەنشینی پەدەكە دەهێننە سەر شاشەی تیڤی و پەدەکەیی بوونیان ڕادەگەیەنێت، ئەم چەواشەکاریی و سیناریۆیانەی پەدەکەش نوێ نییە و هاوشێوەی سیناریۆکانی تریانە، کە بە ناوی حکومەتی هەرێم و ئەنجوومەنی ئاسایشەوە دژی ئازادییخوازان بڵاوی دەکەنەوە.

پەدەكە كێ دەكاتەوە بە پەدەكە؟

لە چەند ڕۆژی ڕابردوو كەناڵەكانی پەدەكە چەند كەسێكیان هێنایە سەر شاشە گوایە لە ناو حزبێکی دیکەوە پەیوەندییان کردووە بە پەدەکەوە، بە وتەی سەركردایەتی پەدەكە، ژمارەیەك كەسایەتی كاكەییەكان چوونەتە ڕیزەكانی پەدەكەوە، بەڵام کاکەییەکان خۆیان ئەم هەواڵە لە ڕۆژنیوزەوە ڕەت دەکەنەوە، بەو پێیەی ئەوانەی کە گوایە چوونەتە ناو پەدەكەوە، یەکیان لیوا جوامێرە خانەنشینی پەدەكەیە پێشتر بەڕێوەبەری گومرگی هەولێر بووە و دواتر وەك جێگری عیسمەت ئەرگووشی بەڕێوەبەری ئاسایشی گشتیی هەرێمی كوردستان دەوامی كردووە، دواتر بە پلەی لیوا لەسەر پەدەكە خانەنشین كراوە، هەروەها عەگید بەهرام کە خەڵكی مووسڵە و هەر لەسەرەتاوە پەدەكە بووە، موقەدەم فەرهاد نەزەر کە لە هێزەكانی یەكەی ٨٠ـی پەدەكە دەوام دەكات، ئەفراح كاكەیی كاندیدی خۆیان بوو لە هەڵبژاردنی پێشوو لە نەینەوا و بۆ ئەم هەڵبژاردنەش كاندیدی پەدەكەیە لە نەینەوا.

ئەم چەواشەکاریی و سیناریۆیانەی پەدەکەش لە دوای ئەوەوە دێت، دوای زنجیرەیەك كۆبوونەوە و خواستی هاوڵاتییان بۆ درووستكردنی یەك لیستی هاوبەش لەنێوان لایەنە كوردییەكاندا بۆ هەڵبژاردنی ئەنجوومەنی پارێزگاكان لە ناوچە دابڕێنراوەكاندا بەتایبەتی لە کەرکووک، بەڵام پەدەكە دژ بەو خواستە وەستایەوە و دەنگی کوردی پەرت کرد و پاڵیدایە بەرەی تورکمانی و عەرەبی سونەوە.

هاوکات بەهۆی سیاسەتی چەوت و دژە کورد و ڕوو لە دوژمنی پەدەکەوە بەشێکی زۆری لە لایەنگران و کادری حزبەکەی لەدەستدا، لە ئێستاشدا لە ڕێگای سیناریۆ و درۆ و چەواشەکارییەوە دەیەوێت باری لاری خۆی راست بکاتەوە و شکستەکانی پینە بکات.

ب.گ

Comments are closed.