هەڵوەرینی پەدەکە لە کەرکووک؛ باجی خیانەتەکانییەتی لە کورد

بنار هیدایەت

بەهۆی سیاسەتی هەڵە و تێکدانی یەکڕیزیی کورد لە کەرکووک و جێبەجێکردنی ئەجێنداکانی دوژمن، کادر و بەرپرس و کاندیدەکانی پەدەکە لەو شارە، وازهێنانی خۆیان ڕادەگەیەنن، ئەمەش بە شکستی سیاسیی پێناسە دەکرێت، بارزانی دڕدۆنگ و تووڕە کردووە و کارتی سووری داوەتە کەمال کەرکووکی.

بە گوێرەی زانیارییەکان بارزانی هۆشداری دەدات بە بەرپرسانی حزبەكەی بە تایبەت كەمال كەركووكی لە ئەگەری وازهێنانی کەسی تر لە حزبەکەی لە  كەركووك هەڵوێستی توندی دەبێت، ئەو هۆشدارییەش كەمال كەركووكی بە جۆرێک پانیک کرد کە ناچار بوو، کۆمەڵێک کۆنە پارتی بهێنێتە سەر شاشە و گەرمیان بکاتەوە، گوایە لە ناو حزبێکی ترەوە پەیوەندییان بە پەدەکەوە کردووە.

كاندیدەكانی پەدەكە بۆ دەست لە كار دەكێشنەوە

سیاسەتی دوژمنکارانەی پەدەکە بەرامبەر کورد و تێکدانی یەکڕیزیی کورد لەو شارە و جێبەجێکردنی ئەجێنداکانی دەوڵەتی داگیرکەریی تورک، وازهێنانی كادیرانی پەدەكەی بەدوای خۆیدا هێناوە، مەسعودی مەلا پەروێز كاندیدی ژمارە دووی پەدەكە بوو لە كەركووك، ئەو دوای دەست لە كار كێشانەوەی ڕایگەیاند، “بەو پەڕی قەناعەتەوە وازم لە پەدەكە هێناوە، چونكە ئەوەی ئەو حزبە دەیكات تەنها درووشمە.

ئاماژەی بەوەشدا، پەدەكە نە سیاسەتی هەیە لە كەركووك نە بەرپرس، كەمال كەركووكی یەكێكە لەو هۆكارانەی كاندید و كادیرەكانی پەدەكە بە كۆمەڵ دەست لە كار دەكێشنەوە، نەترساوین و بۆ پارە و خانوو خەبات و كوردایەتیمان نەكردووە، لە خزمەتی كەركووك و كەركووكییەكان بەردەوام دەبین.”

لە ڕۆژانی ڕابردووشدا، کاوێز مەلا پەروێز بەرپرسی پێشووی گشتی ڕاگەیاندنی پەدەکە لە کەرکووک، وازهێنانی خۆی لەو حزبە ڕاگەیاند و لەبارەی هۆکارەکانییەوە وتی: “لەبەر ئەوەی پەدەکە دژی خواستەکانی گەلی کوردە لە کەرکووک و بەهۆی سیاسەتە نادیموکراسییانە و نانەتەوەییەکانی ئەو حزبەوە وازم لە پۆستەکەم هێنا و هاتمە دەرەوە.”

كەمال كەركووكی و كارتە سوورەكە

ئێستا كەمال كەركووكی بەرپرسی یەكەمی پەدەكەیە لە پارێزگای كەركووك، لێدوان و سیاسەتە هەڵەكانی، مەسعود بارزانی توڕە كردووە، گۆڕینی كەمال كەركووكی لەو بەرپرسیارێتییە ئەگەرێكە لەلایەن بارزانییەوە، چونكە بارزانی كەمال كەركووكی بە كارتی سوور ناوبردووە لەناو سەركردایەتی پەدەكە لە پارێزگای كەركووك، جێهێشتنی بە كۆمەڵی كادیرانی پەدەكە لەو پارێزگایە، بارزانی لە پشتیوانیكردنی ڕاستەوخۆی كەمال كەركووكیی سارد كردووەتەوە و بە دڕدۆنگییەوە هۆشداریی پێداوە.

ب.گ

Comments are closed.