بەپرسێكی یەنەكە: ئەو بانگەشەیەی پەدەكە دەیكات زیان بە كورد دەگەیەنێت

بنار هیدایەت

بەرپرسی مەڵبەندی یەكێتی نیشتیمانی كوردستان “یەنەكە” باس لەوە كات ئەو بانگەشەی پەدەكە لە كەركووك دەیكات زیان بە كورد و بە خۆشی دەگەیەنێت.

چەند ڕۆژێكە پەدەكە بۆ چەواشەكردنی ڕای گشتی، چەند كادرێكی خۆی دەهێنێتە سەر شاشە و ڕایدەگەیەنێت، ئەمانە لەلایەنێكی دیكەوە بوون بە پەدەكە، لەو بارەیەوە ڕەوەند مەلا مەحموود بۆ ئاژانسی ڕۆژ نیوز دوا.

بەرپرسی مەڵبەندی یەنەكە سەبارەت بەو پڕوپاگەندانەی پەدەكە دەڵێت: خۆمان بەو پڕو پاگەندانەی پەدەكەوە سەرقاڵ ناكەین، بەڵكو سەرقاڵین بەوەی میللەتەكەمان بچێتە سەر سندوقەكانی دەنگدان، هەر كەسێك دێتە ڕیزەكانی یەنەكە بەخێرهاتنی لێدەكەین و بیرمان لەوە نەكردووەتەوە كەس بشكێنین، كاری كردار و پەرچەكردارمان پێخۆش نیە لەناو ڕیزەكانی گەلی كوردستان.

وتیشی، ئەوەی پەدەكە دەیكات لە ڕاگەیاندنەكانیدا زەرەر لە میللەتەكەمان و لەخۆشی دەدات بەهیواین دەست لەو جۆرە پڕوپاگەندەیە هەڵبگرێت.

 سەبارەت بە یەكگرتنی لیستە عەرەبییەكان لەدوای هەڵبژاردن لە ئەنجوومەنی پارێزگای كەركووك، وتی: نێوماڵی عەرەبەكان ئەوەندە یەكگرتوو نییە، وە نێوماڵی كورد و توركمانیش یەك لیست نیە، ئەم بابەتانە پێویستە هەڵگرین بۆ دوای هەڵبژاردن، لە ئێستادا جۆش و خرۆشێك هەیە، بۆ ئەوەی كورد لە كەركووك دەنگی زۆرینە بهێنێت، لەگەڵ ئەوەشدا عەقڵییەتێكی شۆڤێنی عەرەبی هەیە كار لەسەر ئەوە دەكات ئێمە وەك كورد دەنگ نەهێنین، لەبەرامبەر ئەوەدا كورد هەست بەوە دەكات پێویستە زۆرترین دەنگ بهێنین بۆ ئەوەی زۆرترین كورسی ئەنجوومەنی پارێزگا ببەینەوە.

لە بەرامبەر پێشبینییەكان بۆ بەدەست هێنانی كورسی ئەنجوومەنی پارێزگا، ڕەوەند مەلا مەحموود باسی لەوەكرد، چاومان لە زۆرترین كورسییە، لەگەڵ ئەوەش پۆستی پارێزگاری كەركووك پۆستێكە مافی كوردە و كار بۆ بەدەستهێنانی دەكەین.

بڕیارە ڕۆژی ١٨ی مانگ، هەڵبژاردنی ئەنجوومەنی پارێزگاكانی عێراق بەڕێوە بچێت و لە ئێستادا بانگەشەكان بەردەوامی هەیە و لایەنەكان كێبڕكێی زۆرترین كورسی دەكەن.

هـ.ح

Comments are closed.