ئەندامانی هەدەپ: پێویستە گەلی کورد دژ بە گۆشەگیرکردنی ڕێبەر ئۆجالان بێنە دەنگ

هەولێر

ئەندامانی هەدەپ لە هەرێمی کوردستان ڕایدەگەیەنن، گۆشەگیرکردنی ڕێبەری گەلی کورد عەبدوڵا ئۆجالان واتا گۆشەگیرکردنی تەواوی گەلی کوردە، بەپێویستی دەزانن گەلی کورد لە هەرچوارپاچەی کوردستان هەڵوێست وەربگرن، تاوەکو گۆشەگیری سەر عەبدوڵا ئۆجالان کۆتایی پێبێت.

ماوەی ٣٣  مانگە گۆشەگیریی قورس لە سەر عەبدوڵا ئۆجالان ڕێبەری گەلی کورد هەیە و تائێستا هیچ زانیارییەک لەبارەیەوە نییە، دەوڵەتى فاشیستى تورک تەنیا لەمساڵدا بەسەدان داواکاری بۆ دیداری ڕێبەر ئۆجالان ڕەتکردوەتەوە.

عابد ئیکە
عابد ئیکە

لەم بارەیەوە عابد ئیکە ئەندامی هەدەپ لە باشووری کوردستان دەڵێت: ماوەی چەند ساڵێکە ڕێبەری گەلی کورد لە لایەن دەسەڵاتدارانی تورکیا گۆشەگیرکراوە هیچ زانیارییەک لەبارەی  ژیان و تەندرووستی ئەم سەرکردە نییە، بۆیە پێویستە تەواوی گەلی کورد  هەوڵەکانیان بخەنەگەڕ، تا وەکو کۆتایی بەم گۆشەگیرییە بهێندرێت.

باسی لەوەشکرد، کۆمەڵگای نێودەوڵەتی و گەلی کورد لە هەرچوار پارچەی کوردستان دژ بە گۆشەگیرکردنی ڕێبەری گەلی کورد عەبدوڵا ئۆجالان بەوەستنەوە، هەروەها زانیاری لەباری ژیان عەبدوڵا ئۆجالان بڵاو بکرێتەوە، بنەماڵەکەی و پارێزەرانی بتوانن سەردانی بکەن لە ئیمڕالی.

محەمەد کایە
محەمەد کایە

محەمەد کایە یەکیکی دیکەیە لە ئەندامی هەدەپ لە باشووری کوردستان دەڵێت: گۆشەگیرکردنی ڕێبەری گەلی کورد عەبدوڵا ئۆجالان، واتا گۆشەگیرکردنی تەواوی گەلی کورد، بۆیە گۆشەگیرکردنی ڕێبەری گەلی کورد جێگای شەرمەزارییە بۆ دووژمنان.

ئەو ئەندامەى هەدەپ باسی لەوەشکردوە، ماوەی ٣٣ مانگە عەبدوڵا ئۆجالان لەژێر گۆشەگیریی توند دایە، ڕێگا نادرێت بنەماڵەکەی و پارێزەرانی سەردانی بکەن، هەروەها هیچ زانیارییەک لە بارەی ژیان و تەندرووستی نییە.

کایە داواکارە گەلی کورد لە هەر چواری پارچەی کوردستان، هەڵوێست دەرببڕن تاوەکو کۆتایی بە گۆشەگیریی سەر ڕێبەری گەلی کورد بهێندرێت.

هـ.ح

Comments are closed.