ناسنامەی بەشێك لە قوربانییانی ئاگركەوتنەوەكەی سۆران ئاشکرا کرا

ناوەندی هەواڵەكان

دوای ئەوەی شەوی ڕابردوو لە ڕووداوێكی ئاگركەوتنەوە لە ئیدارەی سۆران چەند قوربانییەكی لێ كەوتەوە، ناسنامەی بەشێك لە قوربانییەكان بڵاوكرایەوە.

شەوی ڕابردوو لە باڵەخانەیەك لە ئیدارەی سۆران، ١٤ مامۆستا و هاووڵاتی و خوێندكار بە هۆكاری ئاگركەوتنەوە گیانیان لە دەستدا، بەپێی زانیارییەكان ١٠ كەسیان ژنن و چواریان پیاون.

بەپێی ئەو زانیارییانەی بڵاوكراونەتەوە، یەكێك لە قوربانییەكان ناوی محەمەد وەحیدە و خەڵكی دیالەیە و خۆی و دایكی و دوو خوشكی قوربانی ئاگرەكەی ناو باڵەخانەكەن و سەرجەمیان گیانیان لەدەست داوە.

هاوكات دوو لەوانەی گیانیان لەدەست داوە مامۆستان و بە ڕەگەز عەرەبن و یەكێكیان ناوی دکتۆر ئیلهامە و مامۆستا بووە لە فاكەڵتی یاسای زانكۆی سۆران.

یەكێكی دیكە لە قوربانییەكان ناوی مامۆستا مستەفا ئیسماعیلە و خوێندكاری ماستەر بووە لە بەشی عەرەبی، ماوەی ساڵێكە چووەتە ژیانی هاوسەرییەوە و خۆی و هاوسەرەكەی گیانیان لەدەست داوە.

بەپێی زانیارییەكان لە بەشی فریاگوزاریی و بەرگری شارستانی سۆران، ئەوانەی گیانیان لە دەستداوە سەرجەمیان بە دووكەڵ خنكاون و هیچ كام لەوانە جەستەیان نەسووتاوە.

 

ب. هـ

Comments are closed.