بەهۆی حکومەتى هەرێمەوە زیانی ئابووریی گەورە بەر ناوچە گەشتیارییەکانی دووکان کەوتووە

دووکان

شارۆچكەی دووكان ناوچەیەكی گەشتیاریی گرنگە لە هەرێمی كوردستان، بەڵام بەهۆی ئەوەی لە وەرزی زستاندا كەمتر گەشتیارانی ناوخۆیی و بیانیی سەردانی دەكەن، داهاتی  پڕۆژە گەشتیارییەکان بەشێوەیەکى بەرچاو کەم دەکات، کاسبکاران و خاوەن پڕۆژەکانی گەشتیارییش دەڵێن: بەهۆی وەرزی زستان و نەبوونى مووچە و هاوکاری نەکردنی حکومەت، زیانی زۆر بەر کارو کاسبی ئێمە کەوتووە.

شارۆچكەی دووكان لەبەر ئەوەی ناوچەیەكی گەشتیارییە هاوڵاتیان زیاتر سەرقاڵی كاری دووكانداری شوێنی گەشتیاریین، بەهۆی ئەوەی لەوەرزی زستاندا كەمتر گەشتیار سەردانی ناوچەكە دەكات و باردۆخی ئابووری هاوڵاتییان لەوپەری خراپی دایە، پێنەدانی مووچەش بە مووچەخۆران ئەوەندەى دیکە کاریگەریی لەسەر بازاڕ و کار و کاسبی ئەوانیش درووست کردووە.

بێستون عومەر، خاوەن چێشتخانەیە لە شارۆچكەی دووكان دەڵێت: بەهۆی نەبوونی مووچە و نەهاتنی گەشتیار بۆ شارۆچكەی دووكان بێ كار بووین، سەرەڕای بێكاریی نرخی كەلوپەل و پێداویستییەكانی تری خۆراك گران بوون، خەڵكی توانای كڕینی شتی نییە.

بێستوون عومەر
بێستوون عومەر

وتیشی: ئەوەی ئەم دەسەڵاتە دەیكات لە هیچ شوێنێكی دنیا وێنەی نییە، ئەگەر حكومڕانی ئاوا بێت بەهەموو كەسێك دەكرێت، بە تەنها شانزە حكومەتی ئاوا بەڕێوە دەبەم، دەستیان خستووەتە بینەقاقای خەڵكی، ئەوەتا ئێمە شەو و ڕۆژ لەسەر ئەو شەقامین هیچ شتێكی وامان دەست ناكەوێت، بەشی كرێی دووكانەكانمان پەیدا ناكەین.

هێدی عەتا، لە شارۆچکەکەدا دووكانێكی فرۆشتنی ماسی هەیە دەڵێت: ئەو وەرزە خاوەن كار و كاسبكارانی شارۆچكەی دووكان تووشی كێشەی زۆر دەبنەوە، لە لایەك گەشتیار زۆر كەمە و لەلایەكی تر حكومەت موچە نادات، هاوڵاتییان پارەیان پێ نییە، ئەمەش كاریگەریی كردووەتە سەر بژێوی ڕۆژانەی ئێمە، هاوكات جگە لەوەش حكومەت باج و رسوماتی زۆری خستووەتە سەرمان لە كاتێكدا ئەو دوو سێ مانگەی زستان هیچ داهاتێكی وامان نییە، حكومەتیش لە هیچ شتێكی خۆی خۆش نابێت.

هێدی عەتا
هێدی عەتا

ئاماژەی بەوەشکردوە، پێویستە حكومەتی هەرێمی كوردستان ئاسانكاریی و هاوكاریی خاوەن كارەكان بكات، نەوەك باجی زۆریان بخاتە سەر.

ئەحمەد باپیر، گەنجێكی دیکەیە لە شارۆچكەی دووكان بە ئۆتۆمبێلەكەی ماسی دەفرۆشێت و دەڵێت: ساڵانی ڕابردوو گەشتیار زۆر بوو، ئێمەش ئیشمان باش بوو، بەڵام ئێستا بە سێ مانگ جارێك مووچە دەدرێت ئیشی ئێمەش نامێنێت، من مووچە خۆر نیم، بەڵام پێم خۆشە هەموو مانگێك مووچە بدرێت، چونكە ئیشی ئێمەش باش دەبێت و هەموو پەیوەندی بە پارەوە هەیە.

ئەحمەد باپیر
ئەحمەد باپیر

دەشڵێت: پێشتر كورد پارەی پێ بوو، ئێستا جگە لە گەشتیارانی عەرەب و كڕیاری عەرەب، كورد پارەی پێ نییە شت بكڕێت.

هـ.ح

Comments are closed.