ساڵانە نزیکەی ٣٠ هەزار نەمام لە نەمامگەی باخی کەلار بەرهەم دەهێنرێت

ڕۆژنیوز – گەرمیان

وێستگەی باخی کەلار کە نەمامگەیەکە  بۆ بەرهەمهێنانی نەمام، ساڵانە نزیکەی ٣٠ هەزار نەمام لەو وێستگەیە بەرهەم دەهێنرێت و بە نرخێکی کەمتر دەدرێت بە هاوڵاتییان،  ئەوەش کاریگەری باشی هەبووە لەسەر زیادبوونی ڕێژەى سەوزایی لەناوچەکە، بەڕێوەبەری وێستگەکەش دەڵێت: نەمامەکانمان جوتیارێکی زۆر لێی سوودمەند دەبن و ڕێژەی سەوزاییش لە ناوچەکە بەرزتر دەبێت.

وێستگەی باخی کەلار لە ساڵی ١٩٧٩ درووست کراوە، لە ناو سەنتەری شارۆچکەی کەلاری ناوەندی ئیدارەی گەرمیانە و سەر بە  وەزارەتی کشتووکاڵی حکومەتی هەرێمە، ئەو وێستگەیە ساڵانە زیاتر لە ٣٠ هەزار نەمام بەرهەم دەهێنێت بە شێوازی قەڵەم  و زیاتر لە ١٥ هەزاری دەفرۆشێت بە هاوڵاتییان.

 ڕووبەری ئەو وێستگەیە١٦٠ دۆنمە و زیاد لە حەوت هەزار داری جۆراوجۆری هەیە، نزیکەی ٩٠ دۆنمیشی باخی زەیتوون، نارنج و خورمایە، ئەمساڵیش بەرهەمی زەیتوونەکەی ٧٠ تەن بووە.

لەوبارەیەوە نوری مەجید، لێپرسراوی وێستگەی باخی کەلار بە ڕۆژنیوزی وت: ساڵانە ٢٥ بۆ ٣٠ هەزار نەمامی جیاواز بەرهەم دەهێنین بە شێوازی قەڵەم و نزیکەی ١٥ بۆ ٢٠ هەزاریشی دەفرۆشین، نرخەکەشی کەمترە لە بازاڕو ساڵانە وەزارەتی کشتووکاڵ دیاری دەکات، بەمەش لەگەڵ ئەوەی جوتیارێکی زۆر لێی سوودمەند دەبن، ڕێژەی سەوزاییش لە ناوچەکە بەرزتر دەبێت.

نوری مەجید

وتیشی: هەندێ داری وەک نارنج و خورمامان هەیە و بەرهەمیان هەیە، بەڵام بەرهەمەکانیان ساغنابنەوە بەهۆی نەبوونی  کارگەوە، بۆیە بەشێکی فەرمانبەرانی خۆمان دەیکڕن، بەشێکیشی  خراپ دەبن و نافرۆشرێن، داواکارم لە حکومەت گرنگی بە کەرتی کشتووکاڵ بدات و کارگە لە ناوچەکان درووستبکات، بۆ ئەوەی بەرهەمەکانی ئێمە و جوتیارانیش ساغبکرێنەوە.

ئیدریس مەدحەت، بەڕێوەبەری بەشی باخداری لە بەڕێوەبەرایەتی کشتووکاڵی گەرمیان بە ڕۆژنیوزی وت: وێستگەکە تایبەتە بە بەرهەم هێنانی نەمام بۆ زیادکردنی باخ و سەوزایی لە ناوچەکە، جگە لەوەش کۆمەڵێک نەمامی تێدایە وەک دایکانە، ساڵانە قەڵەمیان لێوەردەگرین و دەیدەین بەو هاوڵاتییانەی کە ئارەزووی درووست بوونی باخیان هەیە.

وتیشی: ئەو دارانەی بەرهەمدارن لە وێستگەکە زەیتون، نارنج و خورمایە زیاتر، ٧٢ دۆنم باخی زەیتونمان هەیە و ٦٤ دۆنمی دراوە بەکەرتی تایبەت، ئەوی تریشی لە ژێر سەرپەرشتی وێستگەی باخی کەلارە، جگە لەوەش ١٦ دۆنم باخی خورما و نارنجمان هەیە.

ئیدریس مەدحەت

 ئیدریس مەدحەت ئاماژەی بەوەش کرد،  لە بەرئەوەی لە ناوچەکە بەرهەمێکی زۆری نارنج و خورما هەیە و هاوڵاتییش خواستی زۆری نییە بە تایبەت بۆ نارنج، هەندێکجار بەرهەمەکان دەمێنێتەوە، ئەوانیش ساڵانە داوایان کردووە لە حکومەت، کارگە و ساردکەرەوەی زیاتر بۆ بەرهەمە کشتووکاڵییەکانی گەرمیان درووست بکات.

هـ.ح

Comments are closed.