جارێکی دیکە دادگای فیدڕاڵی بڕیاردانی لە بارەی یاسای هەڵبژاردنی پەرلەمانی هەرێم دواخست

ناوەندی هەواڵەكان

ئەمڕۆ بۆ ١٠ـەمین جار دادگای باڵای فیدراڵیی عێراق بۆ بڕیاردان لە بارەی سكاڵایەک لەسەر یاسای هەڵبژاردنی پەرلەمانی هەرێمی كوردستان کۆبووەوە، بەڵام ئەمجارەش بڕیاری نەدا و دانیشتنەکەی بۆ ١٨ـی ئەم مانگە دواخست.

بەپێی خشتەی دانیشتنەكانی دادگای فیدراڵی، ئەمڕۆ دادگاكە لەسەر چوار سكاڵای جیاواز دانیشتنی ئەنجام دەدا، لە بارەی دواخستنی سكاڵاكەی تایبەت بە هەرێمی كوردستان ڕاگەیاندراوێكی بڵاو كردەوە.

لە ڕاگەیاندراوەكەدا هاتووە، ئەمڕۆ بۆ دادگای باڵای فیدراڵیی عێراق بۆ بڕیاردان لە بارەی سكاڵایەک لەسەر یاسای هەڵبژاردنی پەرلەمانی هەرێمی كوردستان كۆبووەوە، بەڵام ئەمجارەش بڕیاری نەدا و دانیشتنەکەی دواخست بۆ ١٨ـی ئەم مانگە.

سكاڵاكە لەلایەن زیاد جەبار سەرۆكی فراكسیۆنی یەنەكە لە خولی پێنجەمی پەرلەمانی هەرێم و ئامانج نەجیب شەمعون ئەندامی ئەنجومەنی پارێزگای سلێمانی تۆماركراوە، كە تیایدا داواكراوە ماددەكانی (١ و ٩ و ١٥ و ٢٢ و ٣٦) لە یاسای هەڵبژاردنی پەرلەمانی هەرێم/ ژمارەیەكی ساڵی ١٩٩٢ بە نادەستووریی دابنرێت، كە تایبەتن بە بازنەی هەڵبژاردن و كورسی كۆتاكان.

ئەمە لە كاتێكدایە، ڕۆژی ٤ـی ئەم مانگە، دادگای فیدڕاڵی لە بارەی هەمان پرس كۆبووەوە، بەڵام جارێکی دیکە بڕیاری نەدا و دانیشتنەكەی دواخست، تا ئێستا دادگای فیدراڵی ١٠جار لە سەر ئەو سكالایە كۆبووەتەوە و هەموو جارێک بڕیاردانی لەو بارەیەوە دواخستووە.

هـ.ئ

Comments are closed.