“گۆشەگیرییەكانی سەر ڕێبەر ئۆجالان كارێكی نائەخلاقی دەوڵەتی توركە”

هەڵەبجە

تا دێت گۆشەگیرییەکان لە دژی ڕێبەر ئۆجالان توندتر دەکرێتەوە و دەوڵەتی تورک ڕێگە نادات دەنگی بگات بە گەل، ئەمەش نیگەرانی لای توێژەکانی هەڵەبجە درووست کردووە و دەڵێن: ئەمە كارێكی نائەخلاقیە و لەگەڵ بنەماكانی مافی مرۆڤدا ناگونجێت، پێویستە گەل لە بەرامبەر سیاسەتی چەپەڵی دەوڵەتی تورک هەڵوێستیان هەبێت.

توێژەکانی هەڵەبجە، لە بارەی توند کردنەوەی گۆشەگیرییەکانی سەر ڕێبەری گەلی کورد عەبدوڵا ئۆجالان و ڕێگە نەدان بە پارێزەر و خانەوادەکەی، کە چاویان پێی بکەوێت بۆ ڕۆژنیوز دەدوێن.

دەوران محەمەد
دەوران محەمەد

لەو بارەیەوە دەوران محەممەد، مامۆستا بۆ ڕۆژنیوز وتی: ڕۆحییەتی ڕێبەر ئۆجالان، ڕێگەی نادات قبوڵی هەندێك هەلومەرج بكات، كە هەندێك لە سەركردەكانی دیكە بەسەر كوردا دەیهێنن، بۆیە لە زیندان گۆشەگییر كراوە، دوژمنانی كورد دەزانن ئەگەر بەڕێز ئۆجالان لە زیندان ئازاد بكرێت، ئەوا بەهەمان گڕوتینیی پێشوەوە بۆ ئازادیی تێدەکۆشیت.

ئاماژەی بەوەش کرد، نزیك بە نیو سەدەیە هێزی گەریلا هەیە، ئەو هێزە بەو ڕۆحە تێکۆشان دەکات، کە لە بەرێز ئۆجالاندا درەوشاوەتەوە، دەوڵەتی تورك پێی وایە بە تۆپ و تەیارە گرتنی كەسی یەكەم ئەو ڕۆحە كپ دەكات، بە پێچەوانەوە تا ئەو گۆشەگیرییە توندتر بێت خەبات و تێكۆشان بە درەوشاوەتر لە دژی دەوڵەتی تورك ئەنجامدەدرێت.

دەوران محەممەد جەختیشی کردەوە، بە ڕێباز و فكری بەرێز ئۆجالان زۆرێك لە كێشەكانی ڕۆژهەڵاتی ناوین چارەسەر دەبێت، فكر و فەلسەفەی ئەو بۆ چارەسەر هاتووە، شێوازی بیركردنەوەی یەکدی قەبوڵکردن و پێکەوە ژیانە، بەڵام لە دنیای سەرمایەدارییدا ئەوە قبوڵكراو نییە، دەبێت هەمووان بتوێنەوە لەناو سیستەمێكدا.

پێشڕەو یاروەیس
پێشڕەو یاروەیس

هەروەها پێشڕەو یاروەیس، چالاكوان وتی، دەوڵەتی تورك وڵاتێكی فاشیزمە، لە فكری پێكەوە ژیانى گەلان دەترسێت، كە لە فكری ڕێبەر ئۆجالانەوە سەرچاوەی گرتووە، لە كاتێكدا هەبوونی كورد هیچ مەترسی نییە بۆسەر گەلی تورك، ئەم شەڕانگێزییەش زۆر قوڵتربووەتەوە لە كەسایەتی ئەردۆغاندا.

وتیشی، ئێستا دەبینین دەوڵەتی تورك گۆشەگیریی سەر ڕێبەر ئاپۆ توندتر و زەقتر دەكەن، ئەو گۆشەگیرییەی دەوڵەتی تورك نائەخلاقیە، چونكە تەنها لەسەر بەڕێز ئۆجالان نییە، بەڵكو گۆشەگیریی لەسەر گەلێك جێبەجێ دەكرێت.

باسی لەوەش كرد، بە هیچ جۆرێك ڕازی نین بەو گۆشەگیرییە، چونكە لەگەڵ بنەماكانی مافی مرۆڤدا ناگونجێت، چەندین ساڵە بەردەوام توندتر دەكرێتەوە، دەبێت وەك گەلی كورد لەبەرامبەر ئەو بێباوەڕییەی دەوڵەتی تورك هەڵوێستمان هەبێت، خاوەندارێتی لە ڕێبەرایەتی بكەین، دژ بە هەر سیاسەتێكیی چەپەڵ بووەستینەوە.

٢٥ ساڵ پێش ئێستا، لە پیلانگێڕییەکی نێودەوڵەتییدا، بە بەشداریی گلادیۆی ناتۆ و هەموو دەزگا هەواڵگیرییەکانیان، لە وڵاتی کینیا ڕێبەری گەلی کورد عەبدوڵا ئۆجالانیان ڕفاند و لە زیندانی ئیمرالییدا گۆشەگیر کرا، ماوەی نزیکەی ٣٥ مانگیشە، گۆشەگییرییەکی توند لە دژی بەڕێوەدەچێت و ڕێگە بە پارێزەر و خانەوادەکەی نادرێت چاویان پێی بکەوێت و هیچ زانیارییەک لەسەر بارودۆخی تەندرووستی نازاندێت

ب. جـ

Comments are closed.