شەقامی موتەنەبی لە سێبەری كتێبدا هەموو توێژەکانى كۆمەڵگەی لە خۆی كۆكردووەتەوە

بەغدا

لە دوای نۆژەنكردنەوە و پاراستنی مێژووی شەقامی موتەنەبی لە بەغدای پایتەختى عێراق، دووبارە ئەو شەقامە ژیایەوە و پڕبووە لە هەموو توێژەكانی كۆمەڵگە، شەقامەكە بە ناوبانگە بە كتێبخانەكان و شوێنە كولتوورییە جۆراوجۆرەكانی، لە ئێستادا بووەتە ناوەندێكی سەرنجڕاكێش بۆ گەشتیارانی ناوخۆى و بیانى .

لە بەرەبەیانەوە تا نیوە شەو بەتایبەتی لەكاتی پشووەكاندا شەقامەكە جمەی دێت لە سەردانیكەران و گەشتیاران ناوخۆى، جگە لەوەی گەشتیارانی وڵاتانی دیكە دێنە شەقامی موتەنەبی و چێژ لە چالاكییە ڕۆشنبیری و هونەریەكانی شەقامەكە وەردەگرن.

دالیا
دالیا

هاوڵاتییەك بە ناوی دالیا لە شەقامی موتەنەبی بە ئاژانسی ڕۆژنیوزی ڕاگەیاند، كەش و هەوای شەقامی موتەنەبی زۆر جوانە، بەتایبەت لەم ساتە بەهارییەدا، هەروەها جوڵەیەكی ڕۆشنبیرى لەم شەقامەدا هەیە.

ئاماژەی بەوەشكرد، بابەتەكانی سەر شەقامەكە تەنها لە چوارچێوەی گەنجاندا سنووردار نییە، بەڵكو هەموو كەسێك دەتوانێت چێژی لێ ببینێت، چونكە لێرە خێزان و بەساڵاچووان و گەشتیارانی وڵاتانی جیاواز دەبینین.

داود سەلمان، یەكێك لە خاوەن پێشەنگاكانی شەقامی موتەنەبی بە ڕۆژنیوزی ڕاگەیاند، ئێمە لە یەكێك لە شەقامە گرنگەكانی بەغدای خۆشەویستدایین، شەقامی موتەنەبی بە شوێنی كۆبوونەوەى خێزانە عێراقییەكان دادەنرێت، بەتایبەت لە ڕۆژانی هەینی و جەژندا، باسی لەوەشكرد، شەقامەكە زیاتر شوێنی هونەرمەندان، نیگاركێشان،

داود سەلمان
داود سەلمان

نووسەران، وەرزشوانان و تەنانەت كەسایەتییە ناسراوەكانی میدیاکانیشە، شەقامەكە شوێنی ڕۆشنبیری وەك قەشلە و ماڵی ڕۆشنبیری تێدایە، ئەمەش گرنگییەكی دیكەی بۆ شەقامەكە زیاد کردووە.

دەشڵێت، ئەگەر بتەوێت ڕۆشنبیری عێراق و خەڵكەكەی بناسیت، ئەوا لەسەر شەقامی موتەنەبی دەیدۆزیتەوە، كە هەر چوویتە ناو شەقامەكەوە هەست بە ئاسوودەیی دەكەیت، هەموو كەس لێرە یەك خێزانن، هەموو پێكهاتە و مەزهەبەكانی عێراق لێرەدا هەیە، ئێمە بە گوڵەبەرڕۆژەی سپی پێشووازیی لە میوانەکان دەكەین وەك نیشانەی دڵی باشى و نیەت پاكیمان.

درێژی شەقامی موتەنەبی نزیكەی یەك كیلۆمەترە و دەچێتە یەكێك لە كەنارەكانی ڕووباری دیجلە، لە پێشەوە پەیكەرێكی گەورەی موتەنەبی شاعیر دانراوە، شەقامەكە یەكێكە لە شەقامە بەناوبانگەكانی بەغدا و سەرەتای دامەزراندنی دەگەڕێتەوە بۆ سەردەمی عەباسیەكان، سەرەتا ناوی بازاڕی وارقین بوو.

شەقامی موتەنەبی بە بازاڕێكی گەشە سەندووی كتێب دادەنرێت، بەو پێیەی پڕ بووە لە كتێب فرۆش و تەنانەت دەستنووسە بە نرخەكانیش، ئەمە، جگە لەو پێشانگا هونەریانەى لەو شەقامەدا دەكرێت، لە ساڵی ٢٠٢١ شەقامەكە و كتێبخانەكانی بۆ ماوەی چەند مانگێك نۆژەنكرانەوە.

 

هـ.ئ

Comments are closed.