لە نەینەوا گەورەترین بازرگانیی ماددەی هۆشبەر دەستگیر كرا

ناوەندی هەواڵەكان

بەڕێوەبەرایەتیی هەواڵگری عێراق بڵاوی كردەوە، ئەمڕۆ هێزەكانیان بازرگانێكی مادەی هۆشبەریان لە ڕۆژئاوای نەینەوا دەستگیركردووە، كە بە گەورەترین بازرگانی ماددەی هۆشبەر دادەنرێت، هەروەها دەستبەسەر ١٣٥ كیلۆگرام حەبی هۆشبەری جۆراوجۆردا گیراوە.

بەڕێوەبەرایەتیی هەواڵگری سەربازی عێراق لە بارەی دەستگیركردنی بازرگانێكی مەترسیداری ماددەی هۆشبەر لە پارێزگای نەینەوا ڕاگەیاندراوێكی بڵاو كردەوە.

لە ڕاگەیاندراوەكەدا هاتووە، ئەمڕۆ هێزەكانمان بە هەماهەنگی لەگەڵ بەشی كاروباری ماددە هۆشبەرەكانی تەلعەفەر و بە هاوكاری هێزێك لە لیوای ٧٣، توانیویانە گەورەترین بازرگانی ماددە هۆشبەر لە شارەدێی زووماری ڕۆژئاوای پارێزگای نەینەوا دەستگیر بكەن.

ئاماژە بەوەشكراوە، هێزەكانیان دەستیان بەسەر ٨٧ هەزار و ٥٠٠ حەبى هۆشبەری جۆراوجۆردا گرت، كە كێشی دەگاتە ١٣٥ كیلۆگرام، ئەو تۆمەتبار و ئەو كەلوپەلانەی دەستیان بەسەردا گیراوە، دوای تەواوكردنی ڕێكارە یاساییە پێویستەكان، ڕادەستی دەسەڵاتی دادوەری كران.

شارەزایانی عێراقی هۆشداریی دەدەن لە بڵاوبوونەوەی ماددەی هۆشبەر لە عێراق و داوا لە مامۆستایانی ئاینی و میدیا و كەسە دیارەكانی عێراق دەكەن گەنجان و هاوڵاتییانی عێراق لە مەترسییەكانی ماددەی هۆشبەر ئاگادار بكەنەوە.

هـ.ئ

Comments are closed.