لە لەندەن بە شکۆ و ڕێزدارییەوە شەهید هەڵمەت دێرەلوک بە بیرهێنرایەوە

ناوەندی هەواڵەکان

لە شاری لەندەنی پایتەختی بەریتانیان مەڕاسیمێکی شکۆدار بۆ بەرزڕاگرتنی یادی شەهید هەڵمەت دێرەلوک بەڕێووەچوو، تێیدا خانەوادەی شەهید و هاوڕیبازانی پەیامیان پێشکەش کرد و ژیان و تێکۆشانی شەهید نیشانی ئامادەبوان درا.

لە کۆمەڵەی کوردی شاری لەندەن لە وڵاتی بەریتانیا شەهیدانی ۲۳ـی کانوونی یەکەمی ۲۰۲۳ و شەهید هەڵمەت دێرەلوک (کاوە تاکۆر) و ڕێهەڤاڵانی بە بەشداری کوردانی هەر چوارپارچەی کوردستان  بە ڕیزداری بە بیرهێنرانەوە.

 لە مەڕاسیمەکەدا، لە پاش خولەکێک بێدەنگی بۆ تەواوی شەهیدانی ئازادیی کوردستان،  شوان ئاوارە وتاری ڕێکخستنەکانی تەڤگەری ئازادیی کۆمەڵگەی کوردستانی لە وڵاتی بەریتانیا خوێندەوە و تێیدا وێڕای پرسە و سەرخۆشی لە بنەماڵەی تێکۆشەری شەهید هەڵمەت دێرەلوک، داوای لە گەلی باشووری کوردستان و بە تایبەت گەنجان کرد لە بەمبەر ستەم و داگیرکاریی فاشیزمی دەوڵەتی داگیرکەیی تورک بەشداریی تێکۆشان بکەن.

دواتر بەڕێز تاکور زەردەشت باوکی شەهید هەڵمەت، لە ڕێگەی سکایپەوە بەشداریی مەڕاسیمەکە بوو و پەیامێکی پێشکەش بە ئامادەبوان کرد و وتی: “لەبیرتان بێت دەوڵەتی تورک لە سەردەمی عوسمانییەکانەوە تا حکومەتەکەی ئەردۆغان چەندین کۆمەڵکوژییان  لەدژی هاوڵاتییانی کورد ئەنجام داوە، لە کۆمەڵکوژییەکانی دۆڵی زیلان و دەرسیم و ناوچەکانی تری کوردستانەوە بگرە تا تیرۆری ڕۆژنامەنووسان و نووسەران و ئازادییخوازان، بۆیە پێویستە گەلەکەمان ئەمە لەبیر نەکات.”

دواتر ئاسۆ کەمالی هاوسەرۆکی جڤاکی ئازاد لە بەریتانیا بە زمانی ئینگلیزی پەیامێکی ئاڕاستەی بنەماڵەی شەهید کرد و داواشی لە کۆمەڵگەی نێودەوڵەتیی کرد لە بەرامبەر تیرۆری دەوڵەتی تورک هەڵوێستیان هەبێت.

دواتر لەسەر ناوی گەنجانی شۆڕشگێڕ لە بەریتانیا، نامەی گەنجێکی کورد بۆ ئامادەبوان خوێندرایەوە، کە لە بەریتانیاوە بەشداری شۆڕشی ئازادیخوازانەی گەلی کورد بووە  و ئەو نامەیەی بۆ هاوڕێ و هەڤاڵەکانی جێ‌هێشتووە.

لە کۆتاییشدا، ژیان و تێکۆشانی شەهید هەڵمەت دێرەلوک لە ڕێگەی داتاشۆوە نیشان درا، کە جۆش و خرۆشی لە لای ئامادەبووان درووست کرد و مەڕاسیمەکە بە درووشمەکانی “شەهید نامرن” و “بژی ڕێبەر ئاپۆ” کۆتایی هات.

جێگەی ئاماژەیە، ڕۆژی ۲٥ـی شوباتی ۲۰۲٤ لە هەردوو شاری ئۆسلۆ و ستۆکهۆڵمیش، مەڕاسیمی بیرهێنانەوەی شکۆمەندانەی شەهید هەڵمەت دێرەلوک بەڕێووە چوون.

ب.گ

Comments are closed.