لە زیقار ١٠٥ تۆمەتباری شەڕی نێوان دوو هۆز دەستگیركران

ناوەندی هەواڵەكان

وەزارەتی ناوخۆی عێراق بڵاوی كردەوە، دوای ئەوەی شەوی ڕابردوو لە شارۆچكەی  ئیسڵاحی سەر بە پارێزگای زیقار شەڕ لە نێوان دوو هۆزدا ڕوویدا، هێزێكی زۆری ئەمنی گەیشتوونەتە ناوچەكە و قەدەغەی هاتووچۆیان لە شارۆچكەكە ڕاگەیاندووە، هەروەها ٧٥ كەسی تۆمەتباری ئەو شەڕەیان دەستگیركردووە.

وەزارەتی ناوخۆی عێراق لە بارەی سەپاندنی قەدەغەی هاتووچۆ و دەستگیركرنی دەیان تۆمەتباری شەڕەكەی شارۆچكەی ئیسڵاحی سەر بە پارێزگای زیقار، ڕاگەیاندراوێكی بڵاوی كردەوە.

لە ڕاگەیاندراوەكەدا هاتووە، سەرەڕای هەوڵەكانمان بە مەبەستى دووركەوتنەوە لە ململانێ عەشایەرییەكان و ڕەتكردنەوەی بەكارهێنانی چەك لەبری جێبەجێكردنی یاسا، بەڵام تا ئێستاش بەشێكی زۆر لە هۆزەكانی عێراق چەكیان لایە، وەزارەتەکەشمان لە هەوڵدایە بۆ كۆنترۆڵكردنی چەكی دەستی هاوڵاتیان.

ئاماژە بەوەشكراوە، ئەمڕۆ هێزێكی زۆری ئەمنی گەیشتوونە ناوچەكە و قەدەغەی هاتووچۆیان لە شارۆچكەى ئیسڵاح لە سنورى زیقار ڕاگەیاند، دواتر ئۆپەراسیۆنێکیان ئەنجامدا و توانیان ٧٥ كەس بە تۆمەتی بەشداریكردن لە شەڕەكەی شەوی ڕابردوو دەستگیر بكەن.

ئەوەش خراوەتەڕوو، تیمێك لە لێكۆڵەرە باڵاكانی وەزارەتەکەمان نێردراون بۆ شارۆچكەی ئیسڵاح بە مەبەستی لێكۆڵینەوە لە هۆكاری شەڕی نێوان ئەو دوو هۆزە و بوونە قوربانی چەند كەسێك، كە یەكێك لە كوژراوەكان عەمید (عەزیز شەلال جەهل) بەرپرسی هەواڵگری زیقار بوو.

جێگەی ئاماژەیە، شەوی ڕابردوو شەڕ لەنێوان خێڵەكانی عومەر و ڕوومەیددا سەریهەڵدا، چەكی قورس و مامناوەند لە شەڕەكەدا بەكارهێنران، بووە هۆی كوژران پێنج كارمەندی هێزە ئەمنییەكان و سووتاندنی ژمارەیەك ماڵی هاوڵاتیان.

هـ.ئ

Comments are closed.