ئایا سەدر دەگەڕێتەوە گۆڕەپانی سیاسیی عێراق؟

ناوەندی هەواڵەكان

دوای ساڵ و نیوێك لە دەستلەكاركێشانەوەی ٧٣ پەرلەمانتاری ڕەوتی سەدر و دوور كەوتنەوەیان لە كاری سیاسیی، جارێكی دیكە پەرلەمانتاران گەڕانەوە بۆ كۆبوونەوەكان و چالاكییە جەماوەرییەكان، چاودێرانی سیاسیش پێیان وایە، ئەو هەنگاوە سەرەتایەكە بۆ گەڕانەوەی سەدر بۆ ناو گۆڕەپانی سیاسیی و لە هەڵبژاردنی داهاتووی پەرلەمانی عێراقدا بەشدارییەكی فراوانیان دەبێت.

بەپێی ڕێنماییەكانی موقتەدا سەدر، ئەو پەرلەمانتارانەی دەستیان لە كاری پەرلەمانتاری كێشاوەتەوە، بەشداریی كۆبوونەوەیەكی فراوانیان لەگەڵ ژمارەیەك لە ئەندامانی ڕەوتەكەیان كردووە، ئامانجی كۆبوونەوەكە پێكهێنانی ئەو لێژنانەیە، كە ئەركی پەیوەندیكردنیان لەگەڵ بنكە جەماوەرییەكاندا پێ سپێردراوە.

ڕۆژنامەی (ئەلعەرەب) لە زاری چەند سەرچاوەیەكەوە بڵاوی كردووەتەوە، سەدر چی دیكە ئامادە نییە بایكۆتی پرۆسەی سیاسیی عێراق بكات، زیانەكانی زیاتر و قووڵت بكات، بەڵكو بەشداریی لە هەڵبژاردنی داهاتووی پەرلەمانی عێراقدا دەكات، چاویشی لە هەڵبژاردنی پێشوەختەیە، کە بكرێت.

یەكێك لە پەرلەمانتارانی سەدر بە ڕۆژنامەکەى وتووە، گەڕانەوە بۆ پڕۆسەی سیاسیی هێشتا لەسەر مێز نییە، بەڵام نوێكردنەوەی چالاكیی فراكسیۆنی سەدری، ڕەنگە كۆتایی بەو چەقبەستوویی دۆخی سەدریەكان بهێنێت.

ئیحسان شەمەری سەرۆكی ناوەندی لێكۆڵینەوەی سیاسی لە بەغدا ڕایگەیاند، بڕیارەكانی سەرۆكی ڕەوتی سەدری چەند گرنگییەكی هەیە، بەتایبەتی دوای ئەوەی سەردانی ماڵی ئایەتوڵا سیستانی كرد، كە ڕەنگە ئاماژە بێت بۆ ڕازیبوونی سیستانی بۆ بەشداریكردنی سەدر لە هەڵبژاردنەكانی داهاتوو.

ئاماژەی بەوەشكرد، جوڵەكانی ئەم دواییەی سەدر كاریگەریی گەورەی لەسەر هاوپەیمانی چوارچێوەی هەماهەنگی هەیە، كە پێشبینی گەڕانەوەی سەدرییەكان بۆ گۆڕەپانی سیاسیی دەكرێت، بەبێ ئەوەی ڕێكارەكانی گەرٍانەوە بزانن، هەروەها هەندێك لە سەركردەكانی چوارچێوەکە ترسیان لە گەڕانەوەی سەدر هەیە.

چاودێرانی سیاسیش پێیان وایە، ئەو هەنگاوە سەرەتایەكە بۆ گەڕانەوەی سەدر بۆ ناو گۆڕەپانی سیاسی و لە هەڵبژاردنی داهاتووی پەرلەمانی عێراقدا بەشدارییەكی فراوانیان دەبێت.

لە ١٠ـی تشرینی یەكەمی ٢٠٢١ سەرجەم پەرلەمانتارانی سەدر دەستیان لەكاركێشایەوە، هەروەها موقتەدا سەدر لە ١٥ـی حوزەیرانی ٢٠٢٢، لە پرۆسەی سیاسی عێراق كشایەوە و جەختی لەوە كردەوە، كە بەشداری لە هیچ هەڵبژاردنێكی داهاتوودا ناكات، بۆ ئەوەی هاوبەشی لەگەڵ سیاسەتمەدارانی “گەندەڵ” نەكات.

هـ.ئ

Comments are closed.