پێکهاتەکانی شنگال: ئیرادەی گەل لە هێرشەکانی ئەردۆغان بەهێزترە

ناوەندی هەواڵەکان

لە دژی هێرشەکانی دەوڵەتی داگیرکەریی تورک بۆ سەر شنگال، بە پێشەنگایەتی خۆبەڕێوەبەریی شنگال، ڕێپێوانێکی جەماوەریی ئەنجام درا و ڕایانگەیاند، ئەردۆغان لە ڕۆژە پیرۆزەکانماندا هێرش دەکاتە سەر پێکهاتەکان، بەڵام با دڵنیابێت ناتوانێت ئیرادەمان بشکێنێت و ڕێپێوانی ئازادیی ڕاوەستێنێت.

پاش هێرشە ئاسمانییەکەی دوێنێ لە نزیک کامپی سەردەشتی شنگال دژی ئۆتۆمبیلێکی مەدەنی، کە لە ئەنجامدا دوو ژن بریندار بوون، ئیدارەی خۆبەڕێوەبەریی شنگال ڕێپێوانێکی ڕێکخست و بانگەوازی بەشداربوونی کرد، گەل لەسەر بانگەوازی ئیدارەی خۆبەڕێوەبەریی شنگال، لە ناوچە عەرەبنشینەکانەوە ڕوویان کردە ناوچەی سنونێ، سەرۆک عەشیرەت و ڕێکخراوەکانی شنگال بەشداربوون، هەروەها ڕێژەیەکی بەرچاوی ژنان بە بەشداری تاژێ و ژنانی گەنجی شنگال بەشداری ڕێپێوانەکە بوون.

لە ڕێپێوانەکەدا درووشمی “نا بۆ داگیرکاریی دەوڵەتی تورک”  و وێنەی شەهیدانی شنگال و بەتایبەت پێشەنگانی  ئێزدی، کە بەدەستی داگیرکاریی دەوڵەتی تورک و خیانەتی پەدەکە شەهید کراون، بەرز کرانەوە، جەماوەر درووشمی “بکوژ ئەردۆغان” و “بژی بەرخۆدانی شنگال”یان دەوتەوە.

لە کۆتایی ڕێپێوانەکەدا، لەسەر ناوی ئیدارەی خۆبەڕێوەبەریی شنگال قاسم موراد ڕاگەیاندراوێک خوێنرایەوە و وتی: ” لە ڕۆژی لەدایکبوونی ڕێبەر ئاپۆدا ژیانێکی نوێ بۆ گەلانی بندەست دیاری کرا، دوژمنی مرۆڤایەتی ئەردۆغان، بەرگەی ئەم ڕۆژە پیرۆزانە ناگرێت، لە ڕۆژە پیرۆزەکانماندا هێرش ئەنجام دەدات لە دژی پێکهاتەکانی شنگال، لە هێرشەکەدا دوو هاوڵاتی مەدەنی کە لە فەرمان ڕزگاربوون کرانە ئامانج”.

هەروەها ڕایگەیاند، ئەم هێرشە ناتوانێت ڕێپێوانی ئازادیی گەل بوەستێنێت، جەختی کردەوە مێژووی ئەردۆغان پڕە لە ئەشکەنجە و کودەتا و زیندانیی کردن و وتی: “کەس ناتوانێت ئازادیی گەلان بوەستێنێت، ئیرادەی گەل لە هەموو هێرشەکان بەهێزترە، ڕۆڵەکانی ئاگر و ڕۆژ بوون بە کاوەی سەدەی ٢١،  بۆیە بابزانن، دژی ستەم بەرخۆدان گەش دەبێت”.

پاشان دووپاتی کردەوە، دەوڵەتی تورک دەیەوێت تەواوی گەلانی ڕۆژهەڵاتی ناوین ڕیشەکێش بکات، بەڵام سەرکەوتن هەر  بۆ گەلانی بندەستە.

دواتر لەسەر ناوی تەڤگەری ئازادیی ژنانی ئێزدی (تاژێ) زۆزان شنگالی بانگەوازی لە گەل کرد ڕێگە بە خیانەت نەدەن، ڕایگەیاند نەوەک هەر بە فڕۆکە بە چەندین ڕێگە دەیانەوێت گەلەکەمان بسڕنەوە و نابێت کەس ببێتە هاوکاری هێرشەکانی سەرمان، دەوڵەتی تورک و هاوکارانی بەم هێرشانە ناگەنە ئامانج، هەرچەند هێرش بکەن، تێکۆشان مەزنتر دەکەین و دەگەینە سەرکەوتن”.

ب.گ

Comments are closed.