“حوکمى فاشیانەى تورک”

مەعاز فەرحان

هەر وەختێ لە کورد بێ هیوا بووبێتم، هیوا و ورەم لە ئیرادەی کوردانی باکوور وەرگرتووە، هەر کاتێ هەستم کردبێ، ئەوەی هەمانە، گۆرانی و هونەرێکی بازاریی و هەڵکەوت زاهیرییە، رۆحم بە گۆرانی رۆژهەڵات و دڵم بە مۆسیقای باکوور، پاراو کردووە.

ئەو دوو پارچەیە کە لە قۆناغی ئاڵنگاریی و بەرەنگاریین، کوردییان بەپێوە هێشتوەتەوە، باکوور لە سیاسەت و بەرهەمهێنانی ئینسانی بە ئیرادە، رۆژهەڵاتیش بە پاراستنی فەرهەنگ.

ئێمە لە باشوور لە قۆناغی بوون و خۆسەلماندندا کەوتین، لە تاقیکردنەوەی حوکمڕانییدا نەمانتوانی وێنە نێگەتیڤەکەی سەر کورد بشکێنین، کە هەندێک پێیانوایە “کوردەکان بە کەڵکی حوکمڕانی نایەن”.

لە باکوور قۆناغی بەرگریی و ئاڵنگاریی، سەلاحەدین دەمیرتاش و ئەحمەد تورکت هەیە، لە باشووری ئازادکراودا، هاوڕێکانی نەوشیروان مستەفات هەیە، کە ٥٠٠ هەزار دەنگ و هیوای گەلێکیان بۆ گۆڕانکاریی، لە پێناو گیرفان و پۆستدا فرۆشت، خیانەتێکی مێژوویشیان لە رێبەرەکەیان کرد.

ئەم حزب و سیاسیانەی باشوور لە باکوور بونایە، بەرگەی شەش مانگی سیستەمی تورکیایان نەدەگرت و دەتوانەوە، بەڵام ئەوانەی باکوور، چونکە فیکریان هەیە و خاوەن دۆزن، کوشتن و سیاسەتی توانەوە نەیتوانیوە ئیرادەیان بشکێنێت، تەنانەت لە زیندانەکاندا ئازادتر و ئازاتر ئەبن.

دەردە دڵێک، بەبۆنەی حوکمی فاشییانەی، تورکە مەغۆلەکان دەرهەق بە خەباتگێڕ و تێکۆشەرانی باکوور.

ئ.م

ئەم وتارە ڕاوبۆچوونى تایبەتى نووسەر خۆیەتى.