دووەمین فێستیڤاڵی ئەسپسواری لە بناری چیای کارۆخ بەڕێوەچوو

باڵەکایەتی

لە نێو سرووشتی جوان و دڵگیری بناری چیایی كارۆخ، دووەمین فێستیڤاڵی ئەسپسواری بەرێوەچوو، كە تێیدا ٤٠ سوارچاک بەشداربوون و وێڕای نمایشی ئەسپسواری کەلەپوور و فۆلکلۆری کوردیی زیندوو کرایەوە.

ئەمڕۆ بە بەشداری چل سوارچاک لە بناری چیای كارۆخ لە شارەدێی وەرتێی سەر بە شارۆچكەی ڕواندوز، دووەمین فێستیڤاڵی ئەسپسواری بەڕێوەچوو، تێیدا چەند چالاكییەكی کەلەپووریی و فۆلکلۆری کوردی ئەنجام دران.

شڤان جەلال یەكێك لە سەرپەرشتانی فێستیڤاڵەكە بە ڕۆژنیوزی وت، ئامانج لە ئەنجامدانی ئەم فێستیڤاڵە زیاتر پەرەپێدانە بە ئەسپسواری و گرنگیدانە بە توانای ئەسپسواران چونكە لەو ناوچەیە سوارچاکێكی زۆری لێیەو پێویستە پەرەیان پێ بدرێت.

شڤان وتیشی: لە فێستیڤاڵەكەدا چەند چالاكییەكی هونەری وەك گۆرانی و موزیك و شانۆ پێشكەشكران و ئامانج لێی زیاتر پەرەپێدانە بە پەیوەندییە كۆمەڵایەتییەكان و كۆكردنەوەی خەڵكی سنوورەكەیە و پاراستنی کەلتوور و کەلەپووری کوردیی.

كاروان سەلام یەكێك لە سوارچاکە بەشداربووەكانە وتی: ماوەیەكی زۆرە ئامادەكاری دەكەین بۆ ئەنجامدانی فێستیڤاڵی ئەسپسواری بە ئامانجی ئەوەی توانا و بەهرەی خۆمان و هاوڕێیانمان تاقی بكەینەوە و كەشێكی خۆش درووست بكەین بۆ خەڵكی سنوورەكە و ئارەزومەندانی ئەسپسواری.

كاروان دەشڵێت: لە فێستیڤاڵەكەدا چل سوارچاک بەشداربوونە و زیاتریش ئەو كەسانەی ئەسپسوارن  بە ئەسپی كوردی بەشدارن، ئەوەش بۆ ئەوەیە كە توانا و تاقەتی ئەسپی كوردی پیشان بدەین لە ناوچە شاخاوییەكان.

فێستیڤاڵی ئەسپسواری بۆ دووەم ساڵە لە كوێستانی مەیدان لە بناری چیایی كارخ لە سنووری باڵەكایەتی ئەنجام دەدرێت، لەلایەن گرووپی ئەسپسوارانی كارۆخ.

ب.گ

Comments are closed.