لە دهۆك دژی بڕیارێكی حكومەت گردبوونەوە دەستی پێکرد

ناوەوندی هەواڵەكان

ئەمڕۆ دووكاندارانی بازاڕی چەلێی لە پارێزگای دهۆك گردبوونەوەیەكی ناڕەزاییان لە دژی بڕیاری لادانی پەردەی بەردەم دووكانەكانیان دەربڕی، وەک خۆیان دەڵێن: دووكانەكانیان بچووكن و شوێنی تەواوی شمەك و كەلوپەلەكانیان نابێتەوە.

میدیا ناوخۆییەكان لە بارەی هۆكاری گردبوونەوەی ژمارەیەك دووكانداری بازاڕی چەلێی لە پارێزگای دهۆك زانیاری نوێ دەخەنەڕوو.

میدیاكان بڵاویان كردووەتەوە، دوای زیادبوونی ڕووداوەكانی ئاگركەوتنەوە لە بازاڕەكانی هەرێمی كوردستان، حكومەتی هەرێم بڕیاریدا پەردەكانی بەردەم دووكانەکان لاببرێن، ئیدارەی پارێزگای دهۆكیش بڕیاریدا دووكاندارانی بازاڕی چەلی پەردەكانیان لابدەن، چونكە بە هۆكارى تەشەنەكردنی ئاگركەوتنەوە وەسفی دەكەن.

لە بەرامبەردا ئەمڕۆ دووكاندارانی بازاڕی چەلێ دژی ئەو بڕیارە گردبوونەوە و ڕێپێوانێكیشیان بۆ بەردەم پارێزگای دهۆك ئەنجام دا و ڕایانگەیاند: دووكانەكانیان بچووكن و شوێنی تەواوی شمەك و كەلوپەلەكانیان نابێتەوە، بۆیە لە كاتی داخستنی بازاڕدا تەنها بە پەردە دایدەپۆشن.

جێگەی ئاماژەیە، ئەم بڕیارانەی حكومەتی ماوەبەسەرچووی هەرێمی كوردستان لە دوای ئەوە دێت، كە لە چەند ڕۆژی ڕابردوودا چەند جارێك ئاگر لە بازاڕی قەیسەری هەولێر كەوتەوە.

هـ.ئ

Comments are closed.