شرۆڤەكارێكی سیاسی: لەدەستدانی سەرۆكایەتی پەرلەمان بە واتای دۆڕانی حەلبووسی دێت

ناوەندی هەواڵەكان

شرۆڤەكارێكی سیاسی ڕایگەیاند، ئەوەی لە دانیشتنی دوێنێی بۆ هەڵبژاردنی سەرۆكی پەرلەمانی عێراق ڕوویدا، سوپرایزێكی گەورە بوو و هاوپەیمانی تەقەدوومی شەرمەزار كرد، دەشڵێت، لەدەستدانی سەرۆكایەتی پەرلەمان بە واتای دۆڕانی حەلبووسی دێت، لە حكومەتی خۆجێی ئەنبار.

عەدنان تەمیمی شرۆڤەكارى سیاسی لە بارەی ئاڵۆزییەكانی دوێنێی پەرلەمانی عێراق و سەركەوتنى كاندیدەكەی خەمیس خەنجەر، بۆ میدیا عێراقییەكان دەدوێت.

عەدنان تەمیمی بە كەناڵی “بەغداد الیوم”ـی ڕاگەیاند، ئەو دەنگانەی كە دوێنێ سالم عیساوی بەدەستی هێنا بەسەر ڕكابەرەكەیدا سوپرایزێكی گەورە بوو، هەرچەندە هەموو چاوەڕوانییەكان ئاماژەیان بە پێچەوانەوە دەكرد، هەروەها هاوپەیمانەكانی نوری مالیكی پشتگیری مەشهەدانیان کرد.

ئاماژەی بەوەشكرد، ڕووداوەكانی دوێنێی پەرلەمان، ئاماژەیە بۆ ئەوەی كە تەقەدووم كەوتووەتە شەرمەزارییەكی گەورەوە و پێیان وایە لەدەستدانی پۆستی سەرۆكایەتی پەرلەمان نزیكە.

ڕوونی كردەوە، دۆڕانی تەقەدووم لە كێبڕكێی پەرلەماندا ناوەستێت، بەڵكو درێژ دەبێتەوە بۆ حكومەتی خۆجێی ئەنبار و دوو بەرەكییەكى توند درووست دەكات، كە ڕەنگە سەرەتای كۆتای هاتنی تەواوی هاوپەیمانییەكەی حەلبووسی بێت، كە ئەم بابەتەش زۆر شەرمەزاركەرە، ڕێگریكردن لە دانیشتنی دوێنێ تاكە بژاردە بوو كە بەدەست تەقەدوم مابووەوە.

دوێنێ دانیشتی هەڵبژاردنی سەرۆكی پەرلەمانی عێراق بەڕێوەچوو، سالم عیساوی و مەحمود مەشهەدانی دوو كاندیدی سەرەكی ئەو پۆستە بوون، لە دانیشتنەكەی دوێنێدا دوو خولی دەنگدان بەڕێوەچوو، تیایدا دەنگەكانی سالم عیساوی لە پێش دەنگەكانی مەحمود مەشهەدانییەوە بوو، دواتر پەرلەمانتارانی تەقەدووم لە ناو هۆڵی پەرلەمان گرژی و ئاڵۆزییان درووست كرد، نەیانهێشت كاندیدی سەرۆك پەرلەمان هەڵبژێردرێت، بۆیە دانیشتنەكە بۆ كاتێكی نادیار دواخرا.

هـ.ئ

Comments are closed.