ئەمریكا نەیتوانی هێرشەكانی ئیسرائیل بۆ سەر ڕەفح ڕابگرێت

ناوەندی هەواڵەكان

ڕاوێژكاری ئاسایشی نەتەوەیی ئەمریكا سەردانی تەلئەبیبی كرد و لەگەڵ یواف گالانت، وەزیری بەرگری ئیسرائیل كۆبووەوە و لە ئەنجامدا نەیتوانی سەركردەكانی ئیسرائیل ڕازی بكات، كە خۆیان لە هێرش و داگیركردنی سەر شاری ڕەفح لە باشووری كەرتی غەزە بەدوور بگرن.

میدیا عەرەبییەكان لە بارەی سەردانی جاك سولیڤان ڕاوێژكاری ئاسایشی نەتەوەیی ئەمریكا بۆ تەلئەبیب و ناوەڕۆكی كۆبوونەوەی لەگەڵ یواف گالانت، وەزیری بەرگریی ئیسرائیل و بەرپرسانی ئەو وڵاتە زانیاری نوێ دەخەنەڕوو.

میدیا عەرەبییەكان بڵاویان كردەوە، یواف گالانت، وەزیری بەرگری ئیسرائیل لە میانی دیدارەكەیدا لەگەڵ جاك سولیڤان ڕاوێژكاری ئاسایشی نەتەوەیی ئەمریكا بۆ تاوتوێكردنی هێرشەکانیان بۆسەر ڕەفح، كە بابەتی ناكۆكی نێوان ئەمریكا و ئیسرائیلە، گالانت وتویەتى، پابەندین بە فراوانكردنی بازنەی هێرشەکانمان بۆ سەر ڕەفح.

گالانت باسى لەوەکردووە، دووپاتى دەکەینەوە تا هەڵوەشاندنەوەی حەماس و وەرگرتنەوەی ئەو زیندانییە ئیسرائیلییانەی لە كەرتی غەزە دەستبەسەر كراون لە ئەنجامدانى هێرشەکانمان بۆسەر ڕەفح بەردەوام دەبین.

ئەم لێدوانانە گالانت لە دوای ئەوە هات، محەمەد خولەیفی، وەزیری دەوڵەت لە وەزارەتی دەرەوەی قەتەر ڕایگەیاندبوو، لە ژێر ڕۆشنایی بەردەوامی ئۆپەراسیۆنە سەربازییەكان دەردەکەوێت ئیسرائیل، هیچ ئیرادەیەكی سیاسی بۆ گەیشتن بە ڕێككەوتن لەبارەى ئاگربەست لە غەزە نییە.

جێگەی ئاماژەیە، لە ٦ی ئایاری ئەمساڵەوە هێزەكانی ئیسرائیل دەستیان كرد بە ئەنجامدانی هێرشی زەمینی بۆ سەر شاری ڕەفح، تا ئێستاش بەردەوامن لە هێرش و داگیركارییەكانیان.

هـ.ئ

Comments are closed.