سەرۆکی لیژنەى دارایی: لە هەمواری یاسای بودجە مووچەی فەرمانبەران گەرەنتی كراوە

ناوەندی هەواڵەکان

گفتوگۆکانى لیژنەی دارایی پەرلەمانى عێراق لەسەر هەمواری یاسای بودجەی ئەمساڵ بەردەوامە و سەرۆكی لیژنەكەش دەڵێت: لە هەمواری یاساكەدا مووچەی فەرمانبەران و بە هەمیشەییكردنی فەرمانبەرانی گرێبەست مسۆگەر كراوە.

لیژنەی دارایی پەرلەمانی عێراق بە ئامادەبوونی محەمەد تەمیمی وەزیری پلاندانان و تەیف سامی وەزیری دارایی سێیەمین كۆبوونەوەی لەسەر هەمواری یاسای بودجەی ئەمساڵ ئەنجامدا.

بەپێی ڕاگەیەندراوی لیژنەکە، لە کۆبوونەوەکەدا تیایدا گفتوگۆكراوە لەسەر خشتەكانی داهات و تێچووی ناو هەموارەیاساكە و زیادكردنی داهاتی نانەوتی، لەگەڵ دۆزینەوەی میكانیزمێك بۆ كەمكردنەوەی بڕی كورتهێنانی بودجەكە.

لەوبارەیەوە عەتوان عەتوانی سەرۆكی لیژنەی دارایی لەپەرلەمانى عێراق ڕایگەیاند: مووچەی فەرمانبەران و بەهەمیشەییكردنی فەرمانبەرانی گرێبەست لە هەمواری یاسای بودجەی ئەمساڵ گەرەنتی كراوە.

وتیشی: ڕێككەوتن كراوە لەسەر خەرجكردنی شایستە داراییەكانی پارێزگاكان بۆ ساڵی ڕابردوو و ئەمساڵ، دوای دەستبەركردنی شایستە داراییەكانی ئاسایشی خۆراك.

ئەمڕۆ لیژنەى دارایی عێراق بە ئامادەبوونى تەیف سامی وەزیری دارایی عێراق سێییەمین کۆبوونەوەی خۆی لەسەر هەمواری یاسای بودجەی ساڵی ٢٠٢٤ کرد و بڕیارە لە کۆبوونەوەکانى داهاتوو مادەکانى دیکە تەواو بکرێن و ببرێتە هۆڵی پەرلەمان بۆ پەسندکردنى.

هـ.ح

Comments are closed.