لەمساڵدا دەوڵەتی تورک ٨٣٣ جار هێرشی کردووەتە سەر خاکی باشووری کوردستان

ناوەندی هەواڵەکان

ئەندامێکی تیمی کوردستانی عێراق (سی پی تی) ڕایدەگەیەنێت، لە شەش مانگی سەرەتی ئەمساڵدا، سوپای تورکیا  ٨٣٣ هێرش و بۆردوومانی بۆ سەر خاکی هەرێمی کوردستان ئەنجامداوە، بە هۆشیانەوە هەشت هاوڵاتی مەدەنیی شەهیدبوون.

کامەران عوسمان، ئەندامێکی تیمی کوردستانی عێراق (سی پی تی)، لە لاپەڕەی تایبەتی خۆی لە تۆڕی کۆمەڵایەتیی فەیسبووک زانیاریی نوێی لەبارەی ‌هێرشە داگیرکارییەکانی دەوڵەتی تورک خستووەتەڕوو.

کامەران عوسمان ئاماژەی بەوەداوە، تەنها لە سەرەتای ئەمساڵەوە تا مانگی حوزەیران، دەوڵەتی داگیرکەری تورک ٨٣٣ هێرش و بۆردوومانی بۆسەر خاکی باشووری کوردستان ئەنجامداوە.

بەپێی ئامارەکانی ئەو ئەندامە، دەوڵەتی داگیرکەری تورک لە پارێزگای دهۆک ٣٦٥، لە هەولێر ٣٥٦، لە سلێمانی ١٠٢ و لە پارێزگای نەینەوا ١٠ هێرشی ئەنجامداوە.

هەروەها ئاماژەی بەوەشداوە، بە تەنیا لە ماوەی دوو ڕۆژی ڕابردوودا، سوپای تورکیا ٢٧ جار بۆردوومانی بۆ سەر زنجیرە چیای مەتینا و گەلی ڕەشاڤا لە قەزای ئامێدی، چیای ساوێن لە بناری قەندیل، لوتکەی کوڕاشەڵ و بناری چیای کێوەڕەش لە قەزای ڕانیە، چیای جاسووسان لە قەزای پشدەر، گوندی کانی میرانی کۆماری و نزارە لە قەزای پێنجوێن ئەنجامداوە.

لە کۆتایشدا ئەوەی خستووەتەڕوو، بە تەنیا لەم ساڵدا، هەشت هاوڵاتی مەدەنیی، بەهۆی بۆردوومان و لەشکرکێشییەکانی سوپای تورکیا بۆسەر خاکی هەرێم شەهیدبوون.

ب. جـ

Comments are closed.