سەرکردەیەکی شیعەکانی عێراق هەڕەشە لە ئەمریکا دەکات

ناوەندی هەواڵەکان

قەیس خەزعەلی، ئەمینداری گشتی عەسائیبی ئەهلی هەق ڕایگەیاند، ئەگەر ئیسرائیل هێرش بكاتە سەر حزبوڵا و لوبنان، ئەوا سەرجەم بەرژەوەندییەكانی ئەمریكا لە ناوچەكە بەتایبەت لە عێراق دەكرێنە ئامانج.

ئێوارەى ئەمڕۆ قەیس خەزعەلی، ئەمینداری گشتی عەسائیبی ئەهلی هەق کە گرووپێکی چەکداری شیعەیە لە عێراق لەبارەى هێرشی ئیسرائیل بۆسەر لوبنان هەڕەشەى لە ئەمریکا کرد.

قەیس خەز عەلی وتی: لەم ماوەیەی دواییدا دەبینین ئەو هەواڵانەی دزە دەكەن باس لە بوونی ویستی ئیسرائیل بۆ هێرشكردنە سەر لوبنان و حزبوڵا دەكەن.

ئەمینداری گشتی عەسائیبی ئەعلی هەق باسی لەوە کردوە ئەگەر ئیسرایل هێرش بکاتە سەر لوبنان ئەوا بە پشتیوانى ئەمریکا دەبێت و ئەو هاوکاری دەکات، پێشیوایە ئەمریکا ڕای گشتى چەواشە دەکات و لەلایەک دژی هێرشەکە خۆی پیشان دەدات و لەلایەکی دیکەوە پشتیوانی ئیسرائیل دەکات.

قەیس خەز عەلی هۆشداری توند دەداتە ئەمریکا و دەڵێت: لەئەگەری بەردەوامی پشتیوانییەكانی ئەمریكا بۆ ئیسرائیل لەكاتی فراوانكردنی هێرشەكانی و هێرشكردنە سەر لوبنان و حزبوڵا، ئەوا با ئەمریكا بزانێت كە سەرجەم بەرژەوەندییەكانی لە ناوچەكە و بەتایبەت لە عێراق دەكرێنە ئامانج و دەكەونە بەر مەترسی.

ئەم هەڕەشەیەی قەیس خەز عەلی لەکاتێکدایە کە ئیسرائیل ئامادەکاری دەکات بۆ هێرشکردنە سەر حزبوڵا کە لوبنان نیشتەجێن، لە ماوەى ڕابردووشدا هەردوولا هێرشیان کردوەتە سەر یەکتر و تا ئێستاش هێرشەکان دووبارە دەبنەوە.

هـ.ح

Comments are closed.