چالاکوانانی گەرمیان دژی داگیرکارییەکانی دەوڵەتی تورک بەیاننامەیەکیان بڵاوکردەوە

ناوەندی هەواڵەکان

چالاکوانانی گەرمیان لە دژی داگیرکارییەکانی دەوڵەتی تورک هاتنە لای یەک و بەیاننامەیەکی ناڕەزایەتییان بڵاو کردەوە و ڕایانگەیاند، ئامانجی ئەم ‌هێرشانە داگیرکردنی خاکی هەرێمە، بانگەوازیشیان لە هەمووان کرد، بێنە دەنگ و هەڵوێسی نیشتیمانی خۆیان ڕابگەیەنن.

ئێوارەی ئەمڕۆ، بەشێک لە چالاکوانان و سیاسەتمەداران لە شارۆچکەی کەلاری ناوەندی ئیدارەی گەرمیان کۆبوونەوە و باسیان لە دۆخی ئێستای باشووری کوردستان و هێرش و پەلامارەکانی دەوڵەتی داگیرکەری تورک کرد و ئەمشەویش بەیاننامەیەکی ناڕەزایەتییان بڵاو کردەوە.

لە بەیاننامەکەدا هاتووە، لە سۆنگەی هەستکردنمان بە بەرپرسیارێتی لە بەرانبەر خاک و نیشتیمانەکەماندا، ئەمڕۆ وەکو کۆمەڵێک چالاکوان و کەسایەتی کۆبووینەوە و تاوتوێی چەند پرسێکی گرنگ و چارەنووسسازمان کرد، کە خۆی لە بەدەمەوە چوونی پرسی ژینگە و وەستانەوە دژی پەلامارەکانی سەر هەرێمی کوردستان دەبینێتەوە.

 لە بەیاننامەکەدا ئەوەش هاتووە، دەوڵەتی داگیرکەری تورک بەردەوامە لە هێرش و پەلامارەکانی بۆ سەر هەرێمی کوردستان، لە ئێستاشدا ناوچەی بادینانی گرتووەتەوە و ١٥ کیلۆمەتر هاتووەتە ناو قوڵایی خاکی هەرێم، هەروەها ٧ بنکەی سەربازی نوێی داناوە، کە بووەتە هۆی ئاوارە بوونی دانیشتوانی ئەو ناوچانە و سووتاندنی دارو درەختەکانیان، ئەمەش مەترسی گەورەی ژینگەیی درووست دەکات.

هەروەها ڕایانگەیاندووە، لە ئاستی نێودەوڵەتییدا بێدەنگی لە تاوانی کوشتن و بەزاندنی سنوورەکان دەکرێت، لە کاتێکدا ئامانجی ئەم ‌هێرشانە داگیرکردنی خاکی هەرێم  و ئاوارەکردنی خەڵکی مەدەنییە بەتایبەت گوندنشینان، ئەوەی جێگەی سەرسوڕمانیشە تا ئێستا دەسەڵاتدارانی هەرێم و بەغداد هیچ هەڵوێستێکیان نەبووە.

ئەو چالاکوانانە داوا دەکەن لە جەماوەری گەرمیان، لایەنە سیاسییەکان و ڕێکخراوەکانی کۆمەڵگەی مەدەنی بێنە دەنگ و هەڵوێسی نیشتیمانی خۆیان بەرانبەر ئەم داگیرکارییانە ڕابگەیەنن، وەک دەستپێکیش داوای بایکۆتی کاڵا و شمەکی تورکی دەکەین.

لە کۆتایی بەیاننامەکەدا ئەوەش هاتووە، لە ڕۆژانی داهاتوو وەڵامی سوتاندنی ڕەز و باخەکانی هەرێم، بە چاندنی نەمام و چەند کۆڕ و سیمینارێک دەدینەوە، دواتریش هەڵمەتی کۆکردنەوەی واژۆ بۆ دادگای باڵای تاوانەکانی عێراق دەست پێ دەکەین.

ب.گ