ژنانی ئازادییخواز لە ئەڵمانیا جینۆسادی سەر ئێزدییەکانیان شەرمەزار کرد

ناوەندی هەواڵەکان

لە شاری ئۆگوستوس پلاتز لە ئەڵمانیا، بە پێشەنگایەتی گرووپ و ڕێکخراوە ئازادیخوازەکانی ئەڵمانیا، ١٠ـەیەمین ساڵیادی جینۆسایدی شنگال و خیانەتی پەدەکە بە ڕێپێوانێک شەرمەزار کرا.

ئەمڕۆ چالاکوانان و وڵاتپارێزان لە شاری ئۆگوستوس پلاتز لە ئەڵمانیا، بە پێشەنگایەتی گروپەکانی وۆمێن دیفێند ڕۆژئاوا، گێمینسام کائمفێن، ژانگ فراون کۆمۆن، کاتکاڵس ئۆف لایپزیگ و زۆرا بۆ یادکردنەوەی قوربانیانی جینۆسادی شنگال لە ناوەندی شارەکە کۆبوونەوە.

لە دوای خولەکێک وەستان بۆ ڕێزگرتن لە قوربانییانی شنگال چەند وتار پێشکەش کران و ڕایانگەیاند، کە بەهۆی هێرشی داعشەوە، دوای ئەوەی پەدەکە خەڵکی شنگالی بێچەک و بێ بەرگریی بەجێهێشت، لە قڕکردندا دەستدرێژی کرایە سەر هەزاران ژنی ئێزدی و لە بازاڕەکاندا فرۆشران.

هەروەها لە چالاکییەکەدا، سڵاو لەو شەڕڤان و گەریلایانە کرا، کە ئێزدییەکانیان لە جینۆساید ڕزگار کرد.

لە دوای وتارەکان چالاکوانان دەستیان بە ڕێپێوان کرد و تا وێستگەی شەمەندەفەری ناوەندی لایپزیگ بەردەوام بوون.

دواتریش لە وێستگەی شەمەندەفەری ناوەندی لایپزیگ، بڵاوکراوەیان دابەشکرد و چالاکییەکە بە وتنەوەی درووشم کۆتایی هات.

ب. ق