داهاتی نیوەی یەكەمی ئەمساڵی کۆمپانیای دانە غاز ١٩٠ ملیۆن دۆلار بووە

ناوەندی هەواڵەكان

كۆمپانیای دانەغاز بڵاوی كردەوە، داهاتی نیوەی یەكەمی ئەمساڵ ١٩٠ ملیۆن دۆلار بووە و ٧٢ ملیۆن دۆلاری قازانج بووە، هەروەها قەبارەی بەرهەمهێنانی كۆمپانیای دانەغاز بەڕێژەی ٣٪ بەرزبووەتەوە.

كۆمپانیای دانەغاز لەبارەی داهات و قازانجی و ڕێژەی بەرهەمهێنانی نیوەی یەكەمی ئەمساڵی كۆمپانیاکەی ڕاپۆرتێكی بڵاوكردەوە.

لە ڕاپۆرتەكەدا هاتووە، داهاتی نیوەی یەكەمی ئەمساڵی كۆمپانیای دانەغاز ١٩٠ ملیۆن دۆلار بووە و ٧٢ ملیۆن دۆلاری قازانج بووە، لەماوەی شەش مانگی سەرەتای ئەمساڵ قەبارەی بەرهەمهێنانی بەڕێژەی ٪٣ بەرزبووەتەوە بۆ ٣٧ هەزار و ٦٠٠بەرمیل.

ئاماژە بەوەش كراوە، بەرزبوونەوەی قازانجی پوختەی كۆمپانیاكە لە چارەكی دووەمی ئەمساڵدا بووەتە هۆكار بۆ بەرزبوونەوەی پوختەی قازانجی نیوەی یەكەمی ئەمساڵ، لە چارەكی دووەمی ئەمساڵدا ٣٤ ملیۆن دۆلار پوختەی قازانجی هەبووە، كە بەراورد بە چارەكی دووەمی ساڵی ڕابردوو بەڕێژەی ٪٣ بەرزبووەتەوە.

كۆمپانیای داناغاز رایگەیاندووە، هەرچەندە كۆی داهاتەكانی لە نیوەی یەكەمی ئەمساڵدا بەراورد بە نیوەی یەكەمی ساڵی رابردوو دابەزیوە، بەڵام پوختەی قازانجی لەو ماوەیە بەرزبووەتەوە بۆ ٧٢ ملیۆن دۆلار.

كۆی داهاتی كۆمپانیا دانەغاز لە نیوەی یەكەمی ئەمساڵ ١٩٠ ملیۆن دۆلار بووە، لەكاتێكدا لە نیوەی یەكەمی ساڵی ٢٠٢٣ كۆی داهاتەكانی ٢٢٢ ملیۆن دۆلار بووە.

كۆمپانیاكە دەشڵێت:  بەهۆی هێرشەكەی ٢٦ـی نیسانی ئەمساڵ بۆ سەر كێڵگەی كۆرمۆر، دانەغاز و هاوبەشەكانی كاردەكەن بۆ دانانی كاتێكی نوێ بۆ تەواوكردنی پڕۆژەی پەرەپێدانی كیڵگەی كۆرمۆر كە بە (KM250) ناسراوە،  بڕیاربوو پرۆژەكە تا كۆتایی ئەمساڵ تەواوبكرێت، بەڵام هێرشەكە دوایخست.

هـ.ئ