ژنانی هەڵەبجە بەشداری ڕاهێنانێکی تایبەتی سەربازییان کرد

هەڵەبجە

بۆ برەودان بە تواناكانی ژنان و هاندانیان بۆ كاركردن لەبواری سەربازییدا، قایمقامی هەڵەبجە بە هاوبەشی ڕاوێژكاری هێزەكانی هۆڵەندا لە هەرێمی كوردستان، وۆرك شۆپێكی بۆ ژمارەیەك لە كچان و ژنانی هەڵەبجە، لەناو بینای قایمقامییەتی شارەكە ئەنجامدا.

لە وۆرك شۆپەكەدا ڕاوێژكاری هێزەكانی هۆڵەندا باسی لەوە كرد، دەمانەوێت ژنان و كچان لە كوردستان هۆشیاربكەینەوە بەشداربن لە كەرتی سەربازییدا، بەهۆی ئەوەی ئێستا ڕێژەی ژنان لەناو وەزارەتی پێشمەرگەدا تەنها لە ١٪ و دەمانەوێت ئەو ڕێژەیە بەرز بکەینەوە بۆ نزیكەی لە ١٠٪ ..

نوخشە ناسیح قایمقامی هەڵەبجە بە ڕۆژنیوزی وت: ئەمڕۆ لەگەڵ ڕاوێژكارانی كۆنسوڵییەی هۆڵەندا تایبەت بەبەشداریكردنی ژنان لە سێكتەر و كەرتی سەربازیدا، ئەم وۆرك شۆپەمان ئەنجامدا، ئامانجمانە لەم ڕێگەیەوە زیاتر هانی ژنان و كچان بدەین بچنە كەرتی سەربازییەوە، لە پۆلیس و ئەفسەر لە وەزارەتی پێشمەرگە، چونكە لە ئێستادا ڕێژەیەكی زۆر كەم لەژنان بەشدارییان هەیە لەناو هێزەكان و كەرتی سەربازیدا، ئەمجۆرە وۆرك شۆپانە زیاتر هانی گەنجان دەدات بۆ ئەوەی بەشداربن لە كەرتی سەربازیدا.

ئاوێز عەلی خوێندكاری كۆلێژی یاسایە بەشداری لە وۆرك شۆپەكەدا كردووە و لەمبارەیەوە وتی: گرنگە ئەمجۆرە وۆرك شۆپانە بۆ ئێمەی گەنجان، دەمانەوێت زیاتر هانمانبدرێت ژنانیش بەشداریبكەن لە بواری سەربازییدا، لە ئێستادا ڕێژەیەكی زۆر كەم لە ژنان هەن لەناو بوارەكەدا كار دەكەن.

ب.گ