بەهۆی لافاوەوە لە یەمەن ٩٥ کەس گیانیان لەدەستدا

ناوەندی هەواڵەکان

بەهۆی بارانبارینی بەخوڕ و درووستبوونی لافاو لە پارێزگای حودەیدەی یەمەن كە لە ژێر دەسەڵاتی حوسیەكاندایە ١٢٩ كەس بوونەتە قوربانی و لەو ژمارەیە ٩٥ كەسیان گیانیان لەدەستداوە.

ئاژانسی سەبای سەر بە حوسییەکان بڵاوی كردەوە، ژمارەی قوربانیانی لافاوەکەی پارێزگای حودەیدە بۆ ١٢٩ کەس بەرزبووەتەوە کە ٩٥ کەسیان گیانیان لەدەستداوە و ٣٤ کەسی دیكەش بریندارن.

ئەوە لە كاتێكدایە لە کۆتایی مانگی تەمووز و سەرەتای مانگی ئابەوە ڕێژەی بارانبارین لە سەرتاسەری یەمەن زیادی کردووە و لافاوەکە زیانێکی بەرچاوی گیانیی و ماددیی لێکەوتووەتەوە و جگە لەوە زیانی بە هەزاران ماڵ و شوێنی حەوانەوەی خەڵکی ئاوارە گەیاندووە و زیانێکی زۆری بە ژێرخانی یەمەن و تۆڕەکانی ڕێگاوبان گەیاندووە.

ب.گ