شارەزایەكی كەشناسی: شەپۆلێکی گەرما عێراق و هەرێم دەگرێتەوە

ناوەندی هەواڵەكان

ئاراس جەبار ڕایگەیاند: لە سبەینێوە شەپۆلێکی گەرمای بەهێز ناوچەکانی عێراق و هەرێمی کوردستان دەگرێتەوە، بە جۆرێك پلەکانی گەرما دەگەنە ٤٠ پلەی سیلیزی و لە ناوچەکانی باشووری عێراقیش دەگاتە سەرو ٤٥ پلەی سیلیزی.

ئاراس جەبار، شارەزای کەشناسی لەبارەی هاتنی شەپۆلێكی گەرما بۆ ناوچەكانی عێراق و هەرێمی كوردستان ڕاگەیەندراوێكی بڵاوكردەوە.

ئاراس جەبار ڕایگەیاندووە: سبەینێ لە ئەنجامی ھاتنی بارستە ھەوایەکی نوێی گەرم لە باکووری ئەفریقاوە و بەرزبوونەوەی پەستانی بەرگەھەوا شەپۆلێکی گەرما ھەرێمی کوردستان دەگرێتەوە و پلەکانی گەرما سێ تا پێنج پلە بەراورد بە ئەمڕۆ بەرزدەبێتەوە.

دەشڵێت: لە ڕۆژی یەکشەممەوە، کاریگەری ئەو شەپۆلە گەرمایە زیاتر دەبێت و پلەی گەرمی بە ڕێژەی چوار تا پێنج پلەی دیکە بەرزتر دەبێتەوە.

وتوشییەتی: لە ڕۆژی یەكشەممەدا لە سەنتەری پارێزگاکانی ھەرێم بەرزترین پلەی گەرمی سێ تا پێنج پلە بەرز دەبنەوە.

ئەوەشی خستووەتەڕوو: لە ناوچەکانی ئیدارەی گەرمیان و پارێزگاکانی ناوەراست و ڕۆژئاوای عێراق پلەكانی گەرما لەنێوان ٤٠ بۆ ٤٢ پلە دەبێت، هەروەها لە پارێزگاکانی باشوور و باشووری ڕۆژھەڵاتی عێراق لەنێوان ٤٥ بۆ ٤٧ پلە دەبێت.

ئ.م