یەکەمین فیستیڤاڵی هاوینەی دهۆک کرایەوە

دهۆک

یەکەمین فێستیڤاڵی هاوینە لە پارێزگای دهۆک بۆ بەرهەمە خۆماڵیی و بیانییەکان کرایەوە و ماوەی هەشت ڕۆژ دەخایەنێت.

لە پارکی نەورۆز لە شاری دهۆک، بە سەرپەرشتی وەزارەتی بازرگانی و پیشەسازی حکومەتی کاربەرێکەری هەڕێمی کوردستان، یەکەمین فێستیڤاڵی هاوینە کرایەوە.

فێستیڤاڵەکە ئەمڕۆ دەستی پێکردووە و ماوەی هەشت ڕۆژ دەخایەنێت، تێیدا بەرهەمە خۆماڵیی و بیناییەکان دەخرێتەڕوو.

سەبارەت بە ئەنجامدانی فێستیڤاڵەکە سوهام ماجد ڕێکخەری فێستیڤاڵە بۆ ڕۆژنیوز وتی: ئەمە یەکەمین فیستیڤاڵی هاوینەیە کە لە دهۆک ئەنجامدەدرێت، نزیک بە ١٠٠ کۆمپانیا و بڕاند بەشدارییان کردووە، داشکاندنێکی زۆر کراوە بۆ بابەتەکان و نزیکەی ١٥ هەزار دیاری پێشکەش بە میوانان دەکرێت لەلایەن کۆمپانیاکانەوە، هەر کۆمپانیایەک ڕۆژانە دەبێت ٥٠٠ دیاری پێشکەش بکات.

وتیشی: لە فێستیڤاڵەکەدا جۆرەها بەرهەمی خۆماڵی و دەرەکی نمایش کراوە، فێستیڤاڵەکە جیهانییە بەڵام ئەمە بۆ جاری یەکەمە لە کە دهۆک ئەنجام دەدرێت.

هەروەها کاوە عیزەت کە لە هەڵەبجەوە بەشداری لە فێستیڤاڵەکەدا کردووە بۆ ڕۆژنیوز وتی: بە بەرهەمی کوردی وەک هەنگوین، برنج، زەیت و چەند بەرهەمێکی دیکە بەشدارییم لە فێستیڤاڵەکەدا کردووە، لە زۆر فێستیڤاڵی دیکەش بەشداریمان کردووە و سەرکەوتنمان بە دەستهێناوە و نزیکەی ٢٢ ساڵە ئەم کارە دەکەم.

ب. جـ