چالاکوانێک: تاڵیبان بە سێکسی زۆرەملێ هەڕەشە لە زیندانیانی ژن دەکات

ناوەندی هەواڵەکان

چالاکوانێکی ژنانی ئەفغانستان ڕایگەیاند: تاڵیبان بە سێکسی زۆرەملێ هەڕەشە لە زیندانیانی ژن دەکات، دەشڵێت: تاڵیبان بە هەڕەشەکردن و ئەشکەنجەدان دەیەوێت دەنگی ژنانی ناڕازی کپ بکات.

ژولیا پارسی چالاکوانی بواری مافەکانی ژنان و یەکێک لەو كەسانەی لەلایەن تاڵیبانەوە دەستگیركراوە لەبارەی بارودۆخی زیندانیانی ژن لە ژێر دەسەڵاتی تاڵیبان ڕاگەیاندراوێکی بڵاوکردەوە.

ژولیا پارسی ڕایگەیاند: لە زیندانەکانی تاڵیبان زیندانییەکان ئەشکەنجەیەکی زۆر دەدرێن و هەڕەشەی دەستگیرکردن و هەراسانکردنی خێزانەکانیان یەکێکە لە باوترین شێوازەکانی ئەشکەنجەدانی دەروونی لە گرتووخانەکانی تاڵیباندا.

وتیشی: لە ماوەی دەستگیر کردنم بە دەستگیر کردنی کچەکانم و دەستدرێژی سێکسی زۆرەملێی سەر ئەوان هەڕەشەم لێکراوە، هەروەها بە لێدانی کارەبا ئەشکەنجە دراوم.

ئاماژەی بەوەشکرد: تاڵیبان بە هەڕەشە کردن و ئەشکەنجەدان دەیەوێت دەنگی ژنانی ناڕازی کپ بکات.

جێگای ئاماژەیە، لە ساڵی ٢٠٢٢ ژولیا پارسی چالاکوانی بواری مافەکانی ژنان لە شاری کابوولی ئەفغانستان لە لایەن تاڵیبانەوە دەستگیر کرا و بۆ ماوەی سێ مانگ زیندانییکرا، هەروەها ئەو ژنە یەکێکە لە ناڕازییەکانی دژ بە سیاسەتەکانی تاڵیبان لە وڵاتەکەدا.

سـ.خـ