لەکاتی خۆڵباریندا چۆن پارێزگاری لە تەندرووستیمان بكەین؟

ناوەندی هەواڵەكان

بەڕێوەبەرایەتی تەندرووستی هەولێر بڵاوی كردەوە، خۆڵبارین دەبێتە هۆی دروستبوونی هەستیاری حەساسییەت و هەروەها پێڵووی چاوەکان سووردەبنەوە و توشی خوران دەبن، دەشڵێن، دەبێت لە کاتی چوونە دەرەوە دەمامک ببەسترێت و ڕوو پۆشی خۆتان و شوێنی مانەوەتان بکەن بە بەردەوامی.

بەپێی ڕاگەیەندراوێكی پێشتری بەڕێوەبەرایەتی تەندرووستی هەولێر لەبارەی كاریگەرییەكانی خۆڵبارین لەسەر تەندرووستی مرۆڤ و ڕێكارەكانی خۆپارێزی لە مەترسییەكانی بەمجۆرە زانیاری دەخاتەڕوو.

دەقی ڕاگەیەندراوەكە بەمجۆرەیە:-

 کاریگەرییەکانی خۆڵبارین لەسەر تەندرووستیمان چین؟

دەبێتە هۆی هەستیاری حەساسییەت و پێڵووی چاوەکان سووردەبنەوە و توشی خوران دەبێت.

هەستیاری لوت و بەتایبەت تر ناوپۆشی لوت سوور دەبێتەوە تووشی هەوکردن دەبێتەوە بەمەش گیرانی لوت درووست دەبێت و کەسەکە تووشی تەنگەنەفەسی.

فشاری خوێن و خوێن بەربوون و هەوکردنی گوێچکەی ناوەڕاست زۆر جار دەرئەنجامی ئەم خۆڵبارینەیە و کاریگەری درووست دەکات لەسەر ئەو کەسە.

ئەو کەسانەی تەنگە نەفەسن و ڕەبۆیان هەیە لەگەڵ ئەم خۆڵبارینە حاڵەت و نیشانەکانیان زیاد دەکات.

زۆر جار دەبێتەهۆی خورانی پێست و سوربوونەوە و نەخۆشی ئێکزیما.

کاریگەری لەسەر کۆئەندامی هەناسەدان و سییەکان درووست دەکات و بەمەش کەسەکە تووشی کۆکە و پژمین و ناڕەحەتی زۆر دەبێت، چونکە ئەو دەنکۆڵانە هەڵگری میکرۆب و بەکتریان.

پێویستە هاوڵاتیان لەکاتی خۆڵبارین ئەم ڕێنماییانەی خوارەوە پەیڕەو بکەن:–

یەكەم– داخستنی دەرگا و پەنجەرە و پاککردنەوەی شوێنی خۆڵبارین بە تایبەت بۆ ئەو کەسانەی لە ماڵەوەن.

دووەم– لە کاتی چوونە دەرەوە دەمامک ببەسترێ و ڕوو پۆشی خۆت و شوێنی مانەوە بکەی بەبەردەوامی.

سێیەم– دەرگا و پەنجەرە دابخەن ئەگەر بۆ حاڵەتی زۆر پێویست نەبێت مەچنە دەرەوە.

چوارەم– زۆر خواردنەوەی شلەمەنی بەتایبەت لەکاتی شۆفێری و چونە دەرەوە هەوڵبدرێت هەوای ناو ئۆتۆمبێل بکرێتەوە.

پێنجەم- خواردنی میوە و سەوزە بە بەردەوامی.

شەشەم– تێکەڵ نەبوونی هاوڵاتیان و مامەڵە نەکردنیان لەگەڵ سەگ و پشیلە کە لە ئێستادا لەلایەن هاوڵاتیانەوە گرنگی زۆری پێدەدرێت ، چونکە ئەو تۆز و خۆڵە لەگەڵ فەرووی ئاژەڵەکان کێشە درووست دەکات.

حەوتەم– لە کاتی بوونی هەر حاڵەتێکی نەخوازراو هاوڵاتیان دەتوانن پەیوەندی بە هێڵی گەرمی ژمارە ۱۲۲ بکەن.

ئـ.مـ