چاودێرێكی سیاسی لەبارەی دۆخی عێراق هۆشداریی دەدات

بەغداد

چاودێرێكی سیاسی ڕایگەیاند: بەبۆنەی وابەستەیی گرووپە چەکدارەکانی عێراق بە دەوڵەتانی دەرەکی و گەندەڵی و خوڵقاندنی کەشێکی کۆمەڵایەتی ناتەندرووست، عێراق ڕووبەڕووی ئاڵۆزی و قەیران دەبێتەوە، دەشڵێت: ئەگەری هەڵوەشاندنەوەی ئەنجامی هەڵبژاردنی داهاتووش لە ئارادایە.
غازی فەیسەڵ، چاودێری سیاسی لەبارەی دۆخی عێراق بەمجۆرە بۆ ئاژانسی ڕۆژنیوز دەدوێت.

ئەو چاودێرە سیاسییە ڕایگەیاند: نزیکەی ٧٤ گرووپی سەربازی هەیە لە عێراق، کە ٣٤ لەوانە ڕاستەوخۆ پەیوەندییان بە سوپای پاسدارانی ئێرانەوە و خامنەیی هەیە.

وتیشی: ئەو گرووپانە لەبەرئەوەی پارێزگاری لە پرۆژەی ئێرانی دەکەن، ئەو مەترسییەش دەخوڵقێنن، کە عێراق ببێت بە بەشێک لە پرۆژەیەکی گرووپگەرایی، کە لەلایەن تارانەوە بەڕێوە دەبرێت، ئەوەش دواجار بەغداد لە ڕووی سیاسی و جەماوەرییەوە باجەکەی دەدات.

دەشڵێت: ئەو گرووپانە خۆیان بە بەشێک دەزانن لەو پرۆژەیەی ناوی ‘بەرەی مقاوەمە’یە، بە ئاشکرا خۆیان وەک ‘بەرەی بەرگری ئیسلامی’ لە دژی ‘داگیرکاری ئەمریکی’ وێنا دەکەن و تەنها لە ناوخۆی عێراقیش چالاک نین، بەڵکو لە ڕابردوودا لە جەنگەکانی سووریا و لوبنان و یەمەنیشدا تێوەگلاون.

ئاماژەی بەوەشکرد: ئەو گرەوپانە زیاتر لە ٣٥ هێرشی مەوشەکی و درۆنیان کردووەتە سەر باڵیۆزخانەی ئەمریکا لە عێراق، جگە لە هێرشکردن بۆسەر فەرمانگەی هەواڵگری عێراقی، دامەزراوە نەوتییەکان و بنکە سەربازییەکانی وەک بنکەی هەریر و عەین ئەسەد و تاجی و زۆری دیكە.

ئەوەشی خستەڕوو: هۆشداری دەدەم ئەگەر ئەو گروپوانە بەردەوام بن لە بە ئامانجگرتنی بەرژەوەندییەکانی ئەمریکا، لانیکەم شەش بنکەی سەربازی ئەوان لەلایەن سوپای ئەمریکاوە دەکرێتە ئامانج، بەتایەتی بنکەی ‘جەرف ئەلسەخر’، کە تیایدا پرۆژەی بەرهەمهێنانی مووشەک و فڕۆکەی بێفڕۆکەوان بە گەڕخراوە و تەنانەت بەرپرسە عێراقییەکانیش مافیان پێنادرێت سەردانی بکەن.

باسیی لەوەشكرد: ئەمریکا بە فەرمی سوپای پاسدارانی وەک ‘هێزێکی قەدەغە’ وەسف کردووە، ئەوەش ڕێخۆشکەرە، کە بەناوی ‘جەنگ لە دژی تیرۆر’ هەموو هێز و لایەنێکی سەر بەوانیش بکات بە ئامانج.

هەروەها وتیشی: ئەمریکا لەم دواییە بەکرداری فشاری خستەسەر بانکە عێراقیەکان و ڕێگری کرد لە گواستنەوەی مووچەی ئەندامانی حەشدی شەعبی لەڕێگەی ئەو بانکانەوە، ئەوەش بەشێکە لە ڕێکارەکانی لاوازکردنی ئابووری و لەبەریەک هەڵوەشاندنەوەی ئەو گروپانە.

دەربارەی پرۆسەی هەڵبژاردن وتی: بایکۆتی ‘سەدرییەکان و هەڵوێستی ڕەوتی چاکسازی بە سەرۆکایەتی حەیدەر عەبادی، سەرۆکوەزیرانی پێشووتر زەبرێکی گەورە لە فەرمیەتی هەڵبژاردنەکە دەدات.

ئەو چاودێرە سیاسی ڕاشیگەیاند: سەدر درووشمی ‘نە ڕۆژهەڵاتی و نە ڕۆژئاوایی’ بەرزکردووەتەوە و بە ڕاشکاوی لە دژی وابەستەبوونە بە ئێرانەوە، هەروەها بە ئاشکرا دژایەتی پرۆژەی ‘سندوقی ئابووری’ دەکات لەناو وەزارەتەکان و پێیوایە، کە تەنها پارێزگاری لە گەندەڵی دەکەن.

هاوكات دەشڵێت: عێراق لە ساڵی ٢٠٠٣ ـەوە نزیکەی دوو ترلیۆن دۆلاری لەدەستداوە، بێ لەوەی نزیکەی ٧٠٠ ملیار دۆلاریش تەنها لە سەردەمی حکومەتەکەی نوری مالیکی، لە داتاکانی بانکی مەرکەزیدا بەهەدەر دراوە.

لە درێژەی قسەكانیدا وتی: پێشبینی دەكەم ئەگەر زیاتر لە هەشتا لە سەدی دەنگدەران بایکۆتی هەڵبژاردنی پێشوویان کردبێت، ڕەنگە لەم هەڵبژاردنەدا ئەو ڕێژەیە زیاتریش ببێت و ئەوەش وادەکات  نەتەوە یەکگرتووەکان بە فەرمی نەیناسێنێت و دانی پیادا نەنێت.

دكتۆرغازی وتی: لە عێراقدا زیاتر لە ١١ ملیۆن هەژار دەژین، نزیکەی ١٢ ملیۆن نەخوێندەوار و ١٦ ملیۆن خەڵکی بێکار هەیە، جگە لەوەی شەش ملیۆن منداڵی بێسەرپەرشتیار و دوو ملیۆن ژن، کە هاوژیانیان لەدەستداوە یان لە هاوژینەکانیان جیابونەتەوە هەن، هەروەها چوار ملیۆن مرۆڤی بێلانە بوونیان هەیە، لە کاتێکدا ئەو گروپانەی بازرگانی بە ماددەی هۆشبەر و مرۆڤەوە دەکەن حكومەتیش بێدەنگە بەرانبەریان.

لە كۆتایدا دكتۆر غازی دەربارەی بەردەوامی دەستدرێژییەکانی دەوڵەتی تورک لە هەرێمی کوردستان و عێراق باسی لەوەكرد: هیچ بەهانەیەکی سیاسی و سەربازیان نیە، بەتایبەتی لەدوای بانگەوازەكەی بەڕێز ئۆجالان بۆ بۆ وەستاندنی خەباتی سەربازی.

نـ.مـ