QSD: Li Hesekê 40 kes bi gumana endamên DAIŞ’ê ne hatin girtin

NAVENDA NÛÇEYAN

QSD’ê ragihand ku di çarçoveya pêngava ewlehiyê ya li Hesekê de, 40 kes bi gumana endamên şaneyên DAIŞ’ê ne hatin girtin.

Hêzên Sûriyeya Demokratîk (QSD), Yekîneyên Parastina Jin (YPJ) û Hêzên Ewlekariya Hundirîn duh (20`ê Nîsanê) li dijî şaneyên veşartî yên DAIŞ’ê operasyoneke ewlehiyê li taxên bajarê Hesekê dabû destpêkirin.

Navenda Ragihandinê ya Hêzên Sûriyeya Demokratîk (QSD) têkildarî operasyonê daxuyaniyek nivîskî weşand. Di daxuyaniyê de hate diyarkirin ku di operasyona lêgerînê de 40 kes bi gumana endamên şaneyên veşartî yên DAIŞ’ê ne hatin girtin.

Di daxuyaniyê de hate diyarkirin ku “Şaneyên çeteyên DAIŞ’ê bi êrişên xwe yên domdar ên li ser piraniya herêmên Bakur û Rojhilatê Sûriyeyê hewl didin DAIŞ bi rêxistin bikin da ku kiryarên xwe yên terorî zêdetir bikin.”

Di daxuyaniyê hate gotin, êrişên DAIŞ’ê careke din îsbat dikin ku xetereya DAIŞ’ê li ser herêmê û tevahî cîhanê bi dawî nebûye. Bang li civaka navneteweyî hat kirin ku berpirsyariyên xwe yên mirovî, ewlehî û dozgerî li beramberî herêmê bi cih bîne.

Di dawiya daxuyaniyê de bîlançoya operasyona ewlehî û leşkerî ya hevbeş hat aşkerekirin.

Li gorî bîlançoyê, 40 kes bi gumana endamên şaneyên çeteyên DAIŞ’ê ne hatine girtin, 9 klaşînkof, bombeyek destan, telefonek, bêtêlek, 4 demançe û miqdareke cebilane û pêwîstiyên leşkerî hatin desteserkirin.