Ziyanek mezin gihiştiye beşek dexlûdanên cotyarên Germiyanê
GERMIYAN/ROJNEWS
Ji ber hişkesaliyê û kêmbûna baranê ziyaneke mezin gihaye berhemên dexlûdan ên herêma Germiyanê. Cotyaran gotin: “Berhemeke zêde yên me xirab bûne. Hikûmet jî ti alîkarî bi me re nake.”
Li Germiyanê bi qasî 1 milyon û 200 hezar donim zeviyên çandiniyê hene. Dîsa bi qasî 6 hezar çotyar jî hene. Ji ber hişkesalî û kêmbarînê her çend salan carekê ziyanên mezin li cotyarên herêmê dikeve.
Berhemên cotyarên dikevin başûrê Germiyanê îsal xirabin. Îsal ji 44 cotyarên gundê Kewaçermû ya ser bi navçeya Rizgarî ya dikeve sînorê bajarê Kelar ya girêdayî îdareya Germiyanê tenê 10 cotyar karîn zeviyê xwe bidirûn. Cotharên li herêma Germiyanê derbarê berhemên xwe yên îsal ji Rojnewsê re axivîn.
Burhan Mihemed ê ji gundê Kewaçermû diyar kir ku ji 43 cotyarên gundê wan tenê 10 cotyar ziyan ber berhemên wan neketiye û got: “Min ti sûd ji berhemên îsal negirt. Piranî ziyan ber cotyarên gundê me ketiye. Gelek ji gundiyên me pez berdane nava zeviyan. Ji ber ku bi kêr dirûnê nayê. Hinek kes dinasim 3 ton genim kiriye, çandiye bi kêr dirûnê nehatiye pez berdaye zeviyan.”
Cotyar Burhan Mihemed bal kişand ku ne tenê nebûna baranê bûye sedem ku dexlûdan şîn nebe û got: “Sermayê jî bandora xwe li tovên hatî çandin kir. Ev gemim simbil dane, lê dendikê wê pûç û vala bûn. Ji bo wê daxwaz ji wezareta çandiniyê ya Germiyan dikin ku tov bidin me. Vê jî bi nirxekî pir kêm bidin me. Di mijara dermanê genimde jî alîkarî bidin me.”
Cotyarê din ê bi navê Hawkar Salar diyar kir ku ziyanek mezin ber zeviya wî ketiye û got: “Ji vê berhemê îsal me ti sûd negirt. Berhemên îsal ên dexlûdan pir xirabin, ber dirûnê nakeve. Ji bo vê ziyanê kêm bikîn, emê kaya wê bifiroşin kesên lawiran xwedî dikin.”
Hawkar Salar anî ziman ku sala borî dema dexil didirûtin di saetekê de depoya derasê tije dibû, niha bi qasî sê saetan jî tejî nabe. Cotyar Salar rexne li hikûmetê kir û diyar kir ku hikûmetê tov bi giranî daye wan û ten bi qasî 680 hezar dînar daye wan, li bazarê jî heman nirx bû.
Berdevkê Rêveberiya Cotyaran a Germiyanê Star Elî jî destnîşan kir ku ji ber kêm barînê ziyanên mezin gihiştiye cotyarên dikevin herêma başûr û başûrê rojavayê Germiyanê û got: “Herêmên dikevin bakur û bakurê rojhilat ê Germiyên berhemên wan baştire. Li van herêman baran baştir barîbû. Li gorî raporên gihiştî ber destê me hinek cotyar nikarin berhemên xwe yên îsal bidirûn.”
Star Elî anî ziman ku ti yasayek nîne ku ji ber ziyana wan tenzîmat bê dayîna cotyaran û wiha pêde çû: “Salane ew berhemên li Çandiniya Germiyanê hene û dîsa berhemên ku tên hilberîn. Dîsa beşek ji berhemên cotyaran bi nirxeke kêm ji bo piştgirîkirinê dihate dayîna cotyaran. Ev nirx jî ji aliyê wezaretê ve dihate diyarkirin.”
Berdevkê Rêveberiya Cotyaran a Germiyanê Star Elî destnîşan kir ku piştî werza dirûnê qediya wê zêdetir diyar bibe bê ka rêjeya ziyanê çiqase û got: “Sala borî ji ber hişkesaliyê nêzî 30 milyar dînar ziyan gihiştibû cotyaran. Ti cotyaran nekarî zeviyên xwe bidirûn. Ev sal cuda ye, tenê beşek Germiyan ziyan berketiye.”
(eh)