Parlementerê Berê yê Herêma Kurdistanê Ednan Osman, da zanîn dahata Herêma Kurdistanê ji aliyê hizbên desthilatdar ve tê talankirin. Osman got, “Birina dahatê ji aliyê berpirsan ve, tawanek mezine li beramberî aboriya Kurdistanê dikin.”
Di rojên borî de çend dosyên diziyek mezin a malbata Barzanî ku dahata Herêma Kurdistanê birine dervey welat, bi gelgeyan hate eşkerekirin. Vê yekê jî bertekek mezin bi xwere anî. Derbarê mijarê de Parlementerê Berê yê Tevgera Goran ê Parlementoya Herêma Kurdistanê Ednan Osman, ji Rojnews re axivî.
Ednan Osman di destpêka axaftina xwe de li ser dahata Herêma Kurdistanê got: “Belgeya herî baş ji bo em bizanin dahat li cem kêye û çawan tê xerckirin, gotinên Fazil Mîranî ne ku dibêje, ‘dahat pir zêdeye, ger hizb jêgerin, wê têra tevayî welat bikin.’ Yanî dahat li cem hizbaye û ew jî talan dikin.”
Ednan Osman got, heta welatî ji bo guhertinê nebin xwedî îrade, parlementoya Herêmê nebe çavdêrek rast û lêpirsînek rast ji serî heta binî neke, wê ev rewş wisan berdewam bike.
Têkildarî birina dahata Herêmê bo derve jî got: “Berê hizb ji hikûmetê mezintir bû, niha jî di nava hizban de kom avabûne ku ew ji hizb û hikûmetê jî bihêztirin. Birina dahatê ji aliyê van kesan ve tawanek mezine li beramberî aboriya Kurdistanê tê kirin. Ji berku ev dahat diviyabû li nava Herêma Kurdistanê de bihata karanîn.”
(kş)
