Parlamenterek Iraqê diyarkir ku ewê bi rêya parlamentoyê nirxê dolar li beramberî dînarê Iraqê kêm bikin û got; “Zêdekirina nirxê dolar ya li beramberî dînar, bandorek nerênî li aboriya çîna hejar û navend kiriye.”
Di 19’ê Kanuna 2020’an de Banka Navendî ya Iraqê bihayê 100 dolarê Emerîkî ji bo 145 hezar dînarê Iraqê diyarkir. Beriya biryarê 100 dolarê Emerîkî bi 120-121 hezar dînarê Iraqî bû.
Parlamenterê Iraqê yê Çarçoveya Hemahengî Arif Hemamî derbarê daxistina nirxê dolar ya hemberî dînarê Iraqê ji medya Iraqê re axivî.
Arif Hemamî da zanîn ku ew li ser kêmkirina nirxê dolar ya li beramberî bihayê dînar bi israrin û wiha axivî; “Beriya niha bi rêya parlamentoyê nirxê dolar hate zêdekirin, ji bo vê dîsan wê bi rêya parlamentoyê nirxê dolar were kêmkirin. Zêdekirina nirxê dolar ya hemberî dînarê Iraqê, biryarek hikumetê bû, ev jî bûye sedem ku bandorek nerênî li çîna hejar û navendê bike.”
(nr)
