Serokê Odeya Bazirganiyê ya Dihokê girtina deriyê Sêmalkayê weke biryareke siyasî dizane û dibêje, “Zerermendê yekemîn ê girtina deriyan gel e. Bazirganên Başûr û Rojavayê Kurdistanê zerereke mezin ji vê biryarê dibînin. Em bi van pirsgirêkan kêfxweş nînin, hêvî dikin derî vebin.”
Ji roja 16’ê Kanûnê ve hêzên PDK’ê bêyî biryara Hikûmeta Herêma Kurdistanê deriyê Pêşxabûr (Sêmalka) li ser Herêma Bakur û Rojhilatê Sûriyê de girt. Du roj piştî wê di 19’ê Kanûnê de deriyê bazirganiyê yê El-Welîd jî li ser Rojava de girt. Rêveberiya Rojavayê Kurdistanê diyar dike, biryara PDK’ê ne xizmetê ji gelê Kurd re tenê xizmetê ji Tirkiyeyê re dike û banga vekirina deriyan û rakirina dorpêçê dike.Lê tevî nerazîbûnên gelê Rojava û Başûrê Kurdistanê jî PDK di polîtîkaya dorpêç û ambargoyê de bi israr e.
ji sala 2013’an ve ku deriyê Sêmalka-Pêşxabûr navbera herdu Rêveberiyên Kurd ya Başûr û Rojavayê Kurdistanê de vekiriye, ji aliyê Bakur û Rojhilatê Sûriyê heywan, goşt, sebze û fêkî derbasê Başûr tê kirin û ji Başûrê Kurdistanê jî xwarin-vexwarin, pêwîstiyên înşaatan û hwd derbasê Rojava û Sûriye dibe. Her wiha bazirganiya du alî derfeta kar ji bo gelek welatiyên Başûr û Rojavayê Kurdistanê çêdike, lewma bazirganên Başûrê Kurdistanê ji van pêkanînên PDK’ê yên li dijî Rêveberiya Bakur û Rojhilatê Sûriyê nerazîne.
Serokê Odeya Bazirganiyê ya Dihokê Eyad Hisên ku têkildarî mijarê ji ajansa me re axivî, girtina deriyên navbera Rojava û Başûr de ji aliyê PDK’ê ve weke biryareke siyasî dizane û dibêje; “Rojane guhertina berheman navbera Başûr û Rojava de hebû. Girtina derî zererê dide bazirganên herêmê û bandoreke xirab li bazarên Rojava û Başûrê Kurdistanê dike.”
Eyad Hisên daxuyakirin ku zerermendê sereke yê van pêkanînan gelek û got: “erermednê yekemîn ên girtina derî xelke. Em hêvî dikin derî vebin. Jixwe hewldan jî heye ji bo derî careke din werin vekirin.”
(bz)
