Di 5’emîn festîvala filman a Silêmaniyê ya navneteweyî de pêşandana filmê ‘Ji bo azadiyê hate ragirtin. Li gorî çavkaniyekê Tirkiyeyê mûdaxeleyî pêşandana film kiriye.
Biryar bû ku îro di saet 22.00’an de di 5’emîn festîvala filman a Silêmaniyê ya navneteweyî de filmê ‘Ji bo Azadiyê’ bihata pêşandan. Lê pêşandana film ji aliyê organîzetorên festîvalê ve hate rawestandin.
Rêveberê Festîvala Filman a Silêmaniyê ya Navneteweyî Daner Omer ji Rojnews’ê re diyar kir ku biryar dane filmên ji sala 2020’an ve pêşandan bidin, lê filmê ‘Ji bo Azadiyê’ di sala 2019’an de hatiye çêkirin, wê jî wiha kiriye ku ew bêne rexne kirin û got: “Wê film neyê asteng kirin û wê tenê pêşandana wê were paşxistin.” Lê ji bo dema pêşandana film ti dem diyar nekir.
Çavkaniyek jiamadekarê festîvalê ji Rojnews’ê re diyar kir ku biryarek siyasî li pişt ragirtina pêşandana film heye û got: “Piştî ku me reklama film îro kir, konsolosxaneya Tirkiyeyê peywendî bi organîzetorê festîvalê re kir ku pêşandana film qedexe bike. Ev jî sedema qedexeya filme. Nasandina film jî di bernameya festîvalê de hatiye sansûr kirin. Bi awayek rast qala seneryoa film nekirine. Guhertin di navnîşan û nasandina film de çêkirine.”
Rêveberê Festîvala Filman a Silêmaniyê ya Navneteweyî Daner Omer red kir ku sedemek siyasî li pişt ragirtina pêşandana film hebe.
Wê sibe hilberînkarên film bi fermî helwesta xwe nîşan bidin.
Li gorî agahiyên xebatkarên film dane, li ser daxwaza organîzetorên festîvalê tevlî festîvalê bûne.
Filmê “Ji bo Azadiyê “bi derhêneriya Ersîn Çelîk ku di sala 2019’an de hatiye kişandin jî wê di saet 22:00’an de li salona hejmar 3 ya Sitî Sînemaya Silêmaniyê bihata nîşandan. Dema film 142 deqeye. Film li ser berxwedana Sûra Amedê ya şervanên YPS-YPS-Jin hatiye çêkirin.
Di sala 2019’an de jî ev film li Sînemaya Salim a Silêmaniyê hate qedexekirin. Wê demê jî hate ragihandin ku qedexeya film li ser daxwaz Tirkiyeyê bû.
(ab)
