Serokê Partiya Çepgir a Ewropayê Heînz Bîerbaûm xwest qedexeya li ser PKK’ê rabe û got: ”Eger PKK ji lîsteya rêxistinên terorîst ya Yekîtiya Ewropayê derkeve, wê li Tirkiye û herêmê bibe gaveke baş ji bo destpêkirina aşitiyê.”
Serokê Partiya Çepgir a Ewropayê (European Left Party EL) Heînz Bîerbaûm xwest ku PKK ji ‘lîsteya rêxistinên terorîst’ were derxistin.
Bîerbaum got qedexeya li ser PKK’ê li pêş aştiya Tirkiyê-Kurdistanê û herêmê astengiya herî mezin e û destnîşan kir PKK di têkoşîna dijî DAÎŞ’ê de nirxên mirovahiyê parastine.
Bîerbaûm got, ”Rakirina qedexeya li ser PKK’ê û derxistina PKK’ê ya ji nav lîsteya terorê ya YE’yê, li Tirkiyê û hemû herêmê, ji bo pêvajoya aştiyê wê bibe gaveke rast. Li ber ronahiya têkoşîna PKK’ê û hevalbendên wê ya li dijî DAÎŞ’ê û rizgarkirina bi sed hezaran kesên endamên etnîk û pêkhateyên olî, ev ê bibe îşareteke piştevaniyê ya girîng û naskirina tevgera azadiya Kurd.”
Bîerbaûm got ji ber qedexeya li ser PKK’ê, Kurd ne tenê li Tirkiyê, li Ewropayê jî mafê wan têne desteserkirin, Kurd li Ewropayê ji jiyana siyasî têne bêpar hiştin.
Bîerbaûm got, ”Qedexeya li ser PKK’ê, Kurdên ku li Yekîtiya Ewropayê dijîn, ji ber zext û kontrola hêzên ewlehiyê, nahêle ku tevgerên Kurd ên yasayî jî aktîf bin. Bi deh hezaran mirovên Kurd, weke azadiya derbirînê, kombûnê û çapemeniyê, xwedî mafên sereke ne. Qedexeya heyî li pêş entegrasyonê astenge.”
Bîerbaûm herî dawî got ew hevkariya leşkerî ya dewletên Ewropî ya bi dewleta Tirk re şermezar dikin û naxwazin dewletên Ewropî çekan bişînin Tirkiyê û welatên din ên herêmê.
Çavkanî: ANF
(bz)
