Brîtanyayê Tevgera Hemasê li welatê xwe bi temamî qedexe kir. Tevgera Hemasê jî biryara hikumeta Brîtanyayê bi tundî rexne kir û bang li civata navneteweyî kir ku dev ji “dualîtiyê” berde.
Wezîra Karên Hundir a Brîtanyayê Priti Patel piştrast kir ku tevgera Hemasê li Brîtanyayê bi temamî hatiye qedexekirin.
Priti Patel diyar kir ku sedema vê gavê ew e ku Tevgera Hemas xwedî çalakiyên terorê ye û dikare bigihêje çekên pêşketî û navendên ji bo perwerdekirina terorîstan. Wezîra Brîtanyayê her wiha diyar kir ku hikumeta welatê wê girêdayî “têkoşîna li dijî terorê” ye.
Tevgera Hemasê biryara hikumeta Brîtanyayê bi tundî rexne kir û bi daxuyaniyeke çapemeniyê wiha got: “Li şûna ku lêborînê bixwaze û şaşiya xwe ya dîrokî li dijî gelê Filistînê rast bike, li kêleka yên destdirêjiyê dikin, disekine.”
Tevgera Hemas bang li civata navneteweyî û di serî de Brîtanyayê kir ku dev ji “dualîtiyê û binpêkirina qanûnên navneteweyî” berde.
Tevgerê her wiha ev biryar wekî “berdewamkirina dijminahiya li dijî gelê Filistînê û mafên wê yên rewa” bi nav kir û bang li hemû hêz û komên gelê Filistînê û alîgirên doza Filistînê yên li Brîtanya û Ewropayê kir ku vê biryarê şermezar bikin.
